DILI,13 outubru 2022 (TATOLI)—Hospitál Nasionál Guido Valadares (HNGV) prevee Orsamentu Jerál Estadu (OJE) tinan 2023 ho montante $13.567.234.
“Ita prevee orsamentu 2023 hamutuk $13.567.234 hodi finansia ba servisu rutina nian, liuliu estabelese sentru kankru no instalasaun ba sentru kardiaku nian”, hateten Diretór Ezekutivu HNGV, Alito Soares, bainhira halo audénsia ho Komisaun F iha Parlamentu Nasionál, kinta ne’e.
Liuhosi orsamentu ne’e, nia dehan HNGV esforsu atu redús pasiente sira ba rai li’ur, nune’e sei fó prioridade ba instala sentru kemoterapia ba moras kankru nian no mós sentru kardiaku hodi atende pasiente sofre kardiovaskular iha Timor-Leste.
HNGV iha indikadór mak hakarak redús morbilidade no mortalidade ne’ebé iha no mekanizmu sira ne’ebé durante halo mak, treinamentu ba profisionál saúde, redus transferensia pasiente husi munisípiu mai HNGV no mellora sentru saúde internamentu sira.
Iha tinan 2022, HNGV iha Orsamentu Jerál Estadu hamutuk $11.170.875,00, hosi ne’e fahe ba programa rua mak boa-governasaun no saúde, saláriu vensimentu, bens servisu, kapitál menor no kapitál dezenvolvimentu.
“Ezekusaun ba salariu vensimentu too agora la’o di’ak, ba salariu vensimentu ita ezekuta 69% seidauk tama obrigasaun entaun bele atinje 78% iha tinan ikus. Ba kapitál menór ami nia ezekusaun sei ki’ik tanba foin atinje 17%, seidauk inklui obrigasaun ho komitmentu, ba kapitál dezenvolvimentu atinje ba 3% no obrigasaun no komitementu balun halo hela kontratu ho kompaña sira, nune’e ezekuta ona 55 %”, katak.
Hanesan haktuir iha livru anexu XI planu anuál ba servisu no entidade setór saúde públiku administrativu ba tinan 2023, HNGV iha programa 510 boa-governasaun no jestaun instituisionál, atividade hamutuk 48 no sub programa 15.
Hanesan boa-governasaun, jestaun instituisional, infraestrutura edifisiu, administrativu, suporta jestaun bo-agovernasaun, formasaun klínika no formasaun téknika iha área saúde, servisu internamentu, servisu ambulatoriál, servisu enkaminamentu emerjénsia klínika, servisu apoia médiku, infra-estrutura sekundária no tersiaria, forsa traballu servisu, dezenvolvimentu onkolojia, expansaun servisu neofrolojia, aumenta servisu kardiolojia no dezenvolve neurosirurjia.
Jornalista : Felicidade Ximenes
Editór : Florencio Miranda Ximenes
