COVALIMA, 13 outubru 2022 (TATOLI)–Servisu Munisipál Jestaun Merkadu no Turizmu (SMJMT) Covalima, sensibiliza informasaun kona-ba uza fatin merkadu ho loloos ba negosiante sira iha merkadu Suai.
“Ami hala’o sensibilizasaun kona-ba negosiante sira utiliza propriedade no jestaun merkadu Debos ninian,” Diretór Servisu Munisipál Jestaun Merkadu no Turizmu Covalima, Vitorino do Carmo, hateten ba jornalista sira iha Covalima.
Nia dehan, presiza halo sensibilizasaun ba negosiante sira tanba merkadu hanesan fatin ida-ne’ebé ema barak halo negósiu hanesan kompradór ho negosiante sira.
“Sirkulár ne’ebé estabelese la’ós haree ba merkadu sai de’it maibé haree mós ba merkadu sira seluk ne’ebé mak Estadu estabelese ona, tanba hasai sirkulár ne’e bazea ba dekretu-lei,” nia dehan.
Tuir artigu 15 no artigu 16 ko’alia kona-ba utiliza propriedade no jestaun merkadu nian ne’ebé fó ona poder ba membru Governu entaun membru Governu sira hasai ona dekretu-lei no rejimentu sira kona-ba estabelesimentu merkadu.
Xefe Jestaun Merkadu Suai, Mafalda Cardoso, hateten iha merkadu laran fatin barak ema balun hela hanesan sira-nia uma privadu ho nune’e mak realiza sensibilizasaun kona-ba utiliza proprietaria iha merkadu.
“Ita hakarak negosiante OB sira atu muda fali mai fa’an iha merkadu laran, naran katak sira muda mai ona labele iha protesta ruma hosi negosiante sira seluk,” nia informa.
Maske nia parte durante ne’e simu preokupasaun hosi negosiante sira iha merkadu Debos kona-ba problema bee-moos, maibé ho problema refere ko’alia ona ho administradór munisípiu hein lai sei haree ba orsamentu.
Tanba ne’e, xefe merkadu iha ona planu atu ko’alia ho ONG ruma atu haruka proposta hodi hato’o ba iha Programa Nasional Dezenvolvimentu Suku (PNDS) munisipiu atu haree ba prokupasaun negosiante sira iha merkadu Suai.
Jornalista : Celestina Teles
Editór : Cancio Ximenes
