Xefe família 203 iha Ritabou naran laiha lista atu asesu subsídiu $200
BOBONARO, 13 outubru 2022 (TATOLI) — Xefe suku Ritabou, postu administrativu Maliana, munisípiu Bobonaro, Maximiano dos Santos Araújo, fó-sai katak, xefe família 203 mak naran laiha lista atu simu subsídiu ‘tinan nia rohan’ $200 ne’ebé tuir planu sei lansa iha loron 16 fulan-novembru tinan ne’e.
Maximiano haktuir, antes ne’e iha subsídiu subdisiu $200 ne’ebé governu atribui iha ámbitu pandemia Covid-19 xefe família sira-ne’e naran tama iha lista reklamante, maibé lista ne’ebé hosi nasionál haruka mai lideransa komunitária sira halo verifikasaun naran laiha fali.
Notísia relevante: Governu mantein desizaun atribui subsídiu $200 ba uma-kain hotu
“Sira-ne’ebé naran laiha lista hamutuk 203, sira-ne’e uluk subsídiu Covid-19 uluk nian ne’e sira simu, só ké naran ne’e mak keta seidauk halo ajustamentu, entaun sira naran laiha nafatin no mós foun balun depois Covid-19 sira hola malu ita rejista,” nia informa ba jornalista sira, iha kna’ar- fatin, kinta ne’e.
Lideransa komunitáriu ne’e afirma, xefe família 203 ne’e inklui sira-ne’ebé naran dubru, daudaun ne’e autoridade lokál subemete ona parte kompetente atubele konsidera hodi hatama iha lista benefisiáriu nune’e bele hetan sira-nia direitu.
Bazea ba dekretu-lei númeru 37/2022, loron 25 maiu, artigu 2 esplika, benefisiáriu subsídiu tinan nia rohan ‘fim do ano’ mak xefe família ne’ebé rejistadu iha ‘livru uma-kain’ iha suku sira territóriu nasionál tuir termu prevista iha diploma ministeriál númeru 49/2017, 23 agostu.
Iha dekretu-lei ne’e konsidera uma-kain sira-ne’ebé sei hetan subsídiu ne’e mak rejistu efetuada to’o 28 fevereiru 2022 no bainhira auzente iha tempu halo pagamentu tenke aprezenta no halo justifikasaun hotu bele simu.
“Ha’u husu ba komunidade sira, ita nafatin hein ho pasiénsia ba programa governu nian ne’ebé estabelese, la signifika katak sira-ne’ebé naran ita foin haruka ba ne’e laiha direitu, maibé governu nafatin tau iha planu,” nia fó hanoin ba komunidade sira.
Totál lista xefe família iha suku Ritabou ne’ebé naran hala’o ona verifikasaun atu simu sibsídiu ne’e hamutuk 1,600, mai hosi aldeia 12.
Notísia relevante: Governu aprova subsídiu $200 ba uma-kain sira
Jornalista : Sérgio da Cruz
Editór : Evaristo Soares Martins
