VIQUEQUE, 14 outubru 2022 (TATOLI)—Administrasaun postu Uatulari, munsípiu Viqueque, hahú implementa programa mão de obra postu administrativu (PMOPA) faze daruak ne’ebé sei ramata iha fulan-novembru tinan ne’e.
“Implementasaun PMOPA iha postu Uatulari ba faze dahuluk finaliza ona no ami halo ona pagamentu. Nune’e agora ha’u orienta xefe suku sira atu implementa faze daruak,” Administradór postu Uatulari, hateten ba Agência Tatoli, iha ninia knaar fatin, sesta ne’e.
Tuir Autoridade lokál, programa ba faze daruak nian dala ruma sei halo pagamentu iha novembru 2022 no tama fulan-dezembru postu prepara fali relatóriu finál hodi aprezenta ba Ministériu Administrasaun Estatál (MAE).
“Durante implementasaun programa faze dahuluk iha postu, atividade la’o ho di’ak no hatudu rezultadu serbisu kapas tebes. Programa ne’e benifisia ba komunidade,” nia akresenta.
Notísia relevante: MAE sosializa matadalan implementasaun PMOPA autoridade sira iha Viqueque
Implementasaun programa ba faze dahuluk iha suku haat hanesan Macadique, Mataho, Afalokai no Vessoru, ho totál atividade 10 no traballadór 280.
Tipu atividade maka hanesan halo limpeza iha dalan ninin, hamoos baleta, kuda ai-oan no prezeva bee-matan atu labele maran.
Nune’e, implementasaun programa faze daruak iha suku rua hanesan suku Uaitame no Babulo.
Orsamentu ne’ebé aloka ba postu administrativu Uatulari hodi implementa PMOPA hamutuk $114.541.
Jornalista : Vitorino Lopes da Costa
Editora : Julia Chatarina
