MANGGARAI, 14 outubru 2022 (TATOLI) – Ohin sábadu, delegasaun hosi Indonézia lidera hosi Governadór Nussa Tenggara Timur (NTT), Vitór Laiskodat, hamutuk ho ekipa delegasaun sei realiza enkontru ofisiál ho Primeiru Ministru, Taur Matan Ruak, no Prezidente Autoridade Rejiaun Administrativa Espesiál Oé-Cusse Ambeno (RAEOA), kona-bá planu atu harii zona franka iha liña fronteira entre Oé-Cusse ho Timur Tenggah Utara (TTU), Wini.
“Ami-nia viajen ba Dili iha sabádu ne’e, ekipa ida hamutuk ho Governadór Labhanas invesidór boot ida, ne’ebé durante ne’e susesu iha Indonézia, ita ba Dili hasoru Primeiru Ministru realiza enkontru ofisiál hodi ko’alia atu harii zona franka iha Oé-Cusse no Wini iha liña fronteira, tanba asuntu ne’e Governu Sentrál iha ona koñesimentu, entaun iha reforsa halo diskusaun tékniku oinsa bele harii ona,” Governadór NTT, Viktor Laiskodat informa ba Agência Tatoli, iha distritu Manggarai Barat, sesta ne’e.
Nia informa, objetivu viajen ba Timor-Leste atu realiza enkontru ho Primeiru Ministru, Taur Matan Ruak iha Palásiu Governu, sei hamutuk ho Ministru Fidelis Leite Magalhãen, Ministru Koordenadór Asuntu Ekonómiku (MEKAE), Joaquim Amaral no Prezidente Autoridade RAEOA Arsénio Paixão Bano.
Nia informa, iha fulan kotuk Prezidente Repúblika Timor-Leste, hala’o ona vizita ofisiál iha Governu Sentrál Jakarta, no hala’o vizita mós iha distritu Manggarai Barat no kontinua ba Kupaun.
“Ami realiza enkotru ofisiál espesiál NTT ho RAEOA, ita mós konkorda atu serbisu hamutuk promove kooperasaun entre Timor-Leste ho Indonézia espesiál NTT ho Oé-Cusse, ida-ne’e vontade boot ba komunidade hodi dezenvolve illa Timor,” nia katak.
Prezidente Autoridade RAEOA, Arsénio Paixão Bano, informa kona-bá asuntu ne’e importante atu enkontru ofisiál ho Primeiru Ministru, tanba autoridade RAEOA dezloka Indonézia iha fatin Labuan Bajo, hodi hasoru Governur NTT, no diskute kona-bá kooperasaun entre rai rua ne’e, espesiál ba Oé-Cusse Ambeno.
“Nia di’ak ne’e ita tenke haree ba oin, dezenvolvimentu iha área fronteira ne’e to’o iha ne’ebé ona, ita atu lori zona fronteira ne’e, atu lori Oé-Cusse oinsá, tanba ita iha Rejiaun Espesiál, ita-mós iha ZEESM TL, entaun iha posibilidade ita atu aselera dezenvolvimentu iha zona fronteira nian tenke maka’as liután,” nia katak.
Jornalista: Abílio Elo Nini
Editór: Evaristo Soares Martins
