BAUCAU, 14 outubru 2022 (TATOLI) – Povu Baguia sente kontente ho desizaun governu atu reabilita estrada diresaun postu administrativu Laga ba Baguia, munisípiu Baucau tanba kondisaun estraga refere grave liu.
Administradór postu administrativu Baguia, António dos Ramos, hateten, inísiu fulan-outubru ekipa hosi obra públika nasionál sosializa inklui re-verifika dadus hanesan plantasaun, natar, toos, uma no rai eransa sira hosi komunidade sira-ne’ebé afeta direita bainhira implementa projetu ne’e.
“Ami hamutuk ho povu sente kontente tanba liafuan prega ba ami dehan tanggang di atas, loron ruma sei di bawah, ami espera bele hotu lalais,” Admistradór postu administrativu Baguia ne’e hateten iha Sentru Konvensaun Baucau (CCB, sigla portugés), Vila Antiga, kinta ne’e.
Durante re-verifikasaun dadus autoridade hamutuk ho parte seguransa eskuadra Polísia Nasionál Timor-Leste nota komunidade laiha impedimentu no kontinua kolabora ho ekipa tékniku MOP tanba hakarak aselera projetu refere hodi fó benefísiu ba komunidade.
António Ramos argumenta, informasaun hosi ekipa verifikadór sei submete dadus komunidade afetadu ba nasionál no remata sei direta iha mekanismu rua atu halo kompensasaun hanesan transfere osan ba kada bankária ka halo pagamentu ba komunidade iha postu rua ne’e.
“Laiha impedimentu, ami koopera tanba ami-nia hakarak mak ida-ne’e duni tanba durante tinan-barak ona hein,” nia katak.
Ekipa tékniku Ministériu Obra Públika (MOP) sei finaliza re-verifikasaun dadus iha fulan-outubru hanesan rekolla dadus uma no ai-horis hosi komunidade ne’ebé besik iha estrada atu halo kontajen indemnizasaun antes submete relatóriu finál ba nasionál.
Tuir dezeñu estrada diresaun Laga to’o postu Baguia purvolta kilómetru 38 ho luan metru neen ne’ebé sei konstrui dreinajen, konstrusaun ponte inklui monta fasilidade estrada hanesan sinál tránzitu ne’ebé rezultadu aprovizionamentu kompañia internasionál sai manán-na’in ho tipu reabilitasaun ho durasaun kontratu tinan-ida.
Jornalista : Natalino Belo
Editór : Evaristo Soares Martins
