VIQUEQUE 14 outubru 2022 (TATOLI)—Polísia Nasionál Timor-Leste (PNTL) Eskuadra postu Viqueque Vila, munisípiu Viqueque, detein ona suspeitu 12 ne’ebé deskonfia envolve iha konfrontu iha Bikarin.
Konfrontu entre joven Bikarin akontese maizumenus tuku 16:00 lorokraik, iha segunda (10/10), ne’ebé rezulta uma sia no motorizada rua hetan estragu, nune’e Polísia Nasionál Timor Leste Eskudra postu Viqueque Vila kaptura ona suspeita hamutuk na’in-12.
“Konfrontu entre joven Bikarin, postu Viqueque Vila deskonfia grupu arte-marsiál hanesan Ikatan Kera Sakti (IKS) no Persaudaraan Setia Hati Terate (PSHT), ne’ebé akontese iha segunda lorokraik. Ho akontesementu ne’e, ami konsege detein ona suspeitu hamutuk na’in-12,” Komandante PNTL Eskuadra Viqueque Vila, Sargentu Xefe Polísia, Venseslau Moreira de Oliveira Freitas, hateten ba Agência Tatoli, iha Eskuadra PNTL postu Viqueque Vila.
Notísia relevante: Konfrontu iha Becora, PNTL detein suspeitu nain-31
Komandante PNTL Eskuadra Viqueque Vila, dehan autoridade seguransa halo ona identifikasaun hodi hein prosesu tuir mai.
“Hosi konfrontu ne’e, vítima sira ne’ebé sira-nia uma hetan estragu hakarak lori prosesu ne’e ba oin. Nune’e, bainhira halo hotu identifikasaun, orsida lorokraik ka aban sei lori aprezenta ba Ministériu Públiku,” nia tenik.
Biban ne’e, Komandante husu suspeitu sira atu hakmatek iha uma, labele konvoka malu tuur hamutuk no haree serbisu ruma halo.
“Daudaun ne’e besik ona loron finadu, ita atu komemora loron finadu nian. Tanba ne’e ha’u husu suspeitu sira hakmatek labele konvoka malu hodi halibur malu, ida-idak hakmatek iha uma atu labele akontese tan konfrontu ruma,” nia sujere.
Aleinde ne’e, nia dehan, daudaun situasaun atuál iha Bikarin la’o hakmatek no laiha barullu ruma iha fatin akontesimentu.
“Hodi kalan ha’u haree situsaun iha Bikarin hakmatek no PNTL sei kontrola nafatin atu labele akontese tan konfrontu,” nia tenik.
Jornalista : Vitorino Lopes da Costa
Editora : Julia Chatarina
