Protesaun Sivíl Baucau apoia emerjénsia ba vítima inséndiu iha Vemasse
BAUCAU, 14 outubru 2022 (TATOLI) – Diresaun Serbisu Munisipál Protesaun Sivil no Dezastre Naturál (DSPDN), Baucau apoia emerjénsia ba vítima relasiona ho kazu inséndiu ne’ebé rezulta uma-ida iha aldeia Betulale, suku Vemasse Tasi, postu administrativu Vemasse, munisípiu Baucau.
Apoia emerjénsia ne’e relasiona ho akontesimentu inséndiu ne’ebé akotese iha loron-kinta, 13 outubru purvola tuku 11:00 kauza hosi sirkuitu elétriki ne’ebé rezulta sasán uma-laran hetan estragu tótal tanba uma refere konstrui ho bebak no kakuluk tali-tahan.
“Sasán uma-laran barak mak la konsege salva hanesan hahaan no nesesidade seluk nune’e ekipa protesaun sivíll apoia emerjénsia ba vítima,” Diretór Serbisu Munisipál Protesaun Sivil no Dezastre Naturál, Nelson Nunes hateten iha Vila Nova, sesta ne’e.
Parte diresaun direitamente halo intervensaun hanesan halo evakuasaun ba vítima no halo levantamentu dadus no direitamentu apoia emerjénsia hanesan hahaan kompostu hosi foos, supermi, mina modo nian, ikan lata, koto, susubeen lata inklui ekipamentu dapur kompostu sana, taxu, bikan kanuru no lona.
Vítima sira-nia kondisaun trauma kompostu hamutuk membru família na’in-neen nune’e provizoriumente hela iha uma viziñu tanba kondisaun uma labele atu hela relasiona ho akontesimentu inséndiudiu ne’e.
“Ita rekolla dadus hosi vítima tanba hetan estragu hosi inséndiu no sei submete dadus ba nasionál atu hetan apoia materiál konstrusaun,” Nelson Nunee akresenta.
Diresaun Protesaun Sivil no Dezastre Naturál apela ba komunidade sira atu kuida aan relasiona ho utilizasaun elétrika hanesan kontrolu ekipamentu eletrónika ne’ebé risku ba sirkuitu no kontinua antisipa ba kondisaun klima tanba anin no udan.
Jornalista : Natalino Belo
Editór : Evaristo Soares Martins
