RAEOA finaliza ona sensu populasaun no uma-kain tinan 2022
OÉ-CUSSE, 14 outobru 2022 (TATOLI)— Ekipa Servisu Estatístika Rejiaun Administrativa Espesiál Oé-Cusse Ambeno (RAEOA) finaliza ona sensu populasaun no uma-kain tinan 2022 iha rejiaun ne’e.
Ekipa Servisu Estatístika RAEOA) hala’o ona sensu populasaun no uma-kain ba tinan 2022 atinje 100% ekivalente numéru uma-kain 17, 848 iha rejiaun ne’e.
Hosi dadus ne’e, hatudu kresimentu populasaun aumenta 15% kompara ho dadus estimasaun 17,469 hosi Dirasaun Jerál Estatístika Nasionál.
Xefe Servisu Estatístika RAEOA, Florinda de Fátima Bobo, informa antes ne’e ekipa halo ona rekrutamentu ba enumeradór hamutuk 221 hodi foti dadus iha suku 16 tuir área numerasaun ne’ebé Diresaun Jerál Estatístika nasionál identifika hamutuk 159.
Nia hatutan, hosi área numerasaun sira-ne’e fahe ba sub-rejiaun haat, hanesan Nítibe área numerasauan 26, Oesilo área numerasaun 25, Pássabe hamutuk área numerasaun 18 no Pante Makassar área numerasaun 90.
“Hosi totál área numerasaun ne’e iha enumeradór sira halo ona sensu populasaun no uma-kain hamutuk 17,848 kompara ho estimasaun uma-kain hamutuk 17,469 ka kresimentu uma-kain aumenta 15% hosi totál uma kain ne’ebé iha”, nia ko’alia iha RAEOA, sesta ne’e.
Durante peskiza ekipa sensu hasoru dezafiu mak liña internet, tanba iha área numerasaun balun susar tebes atu asesu ba liña internet. Maske hasoru dezafiu enumeradór sira tenta no buka manaira bele sinkroniza dadus sira mai nasionál tuir nia tempu.
Dezafiu segundu maka iha uma-kain balun enumeradór sira ba vizita, responsável xefe uma-kain sai ba to’os no enumeradór sira fó hela karta vizita ba sira atubele hola parte iha sensu no balun vizita dala tolu ona mós la konsege.
“Sira-ne’ebé la-konsege Diresaun Jerál Estatístika sei kria ekipa task force ba vizita fila-fali área numerasaun ho nia uma-kain ne’ebé maka sedauk rejistu atubele rezista hotu,” nia katak.
Komunidade suku Costa, sub-rejiaun Pante Macasar, Júlio Feno, sente kontenete bele hola parte iha sensu populasaun no uma-kain 2022 nian, tanba sensu ne’e hanesan sasukat bele hatene kondisaun moris pupulasaun nian no totál populasaun ne’ebé maka iha RAEOA no mós nasionál.
“Sensu ne’e di’ak no sensu ne’e kapaas, ha’u rasik louva, hosi sensu ne’e maka ita iha dadus no dadus sira-ne’e utiliza lori halo proposta liga ho kondisaun moris komunidade nian ,” nia hateten.
Jornalista : Francisco Sony
Editór : Evaristo Soares Martins
