DILI, 14 outubru 2022 (TATOLI)—Servisu Nasionál Ambulánsia no Emerjénsia Médiku (SNAEM.IP) prevee $2,136,709 iha Orsamentu Jerál Estadu (OJE) 2023.
“Orsamentu Jerál Estadu 2023, ne’ebé ami simu ba tinan oin hamutuk $ 2,136,709, ne’ebé fahe ba kategoria ba saláriu no vensimentu, bens no servisu no kapitál menor. Ami mós propoin orsamentu adisionál rihun $65 hodi hola tan karreta ambulánsia 10, para bele kobre ba munisípiu sira,” Diretór SNAEM.IP, Horacio Sarmento, hateten ba Agéncia TATOLI iha Parlamentu Nasionál, sesta ne’e.
Tanba, nia dehan Munisípiu sira enfrenta hela karreta ambulánsia balun kareta aat, no balun tuan, nune’e koko aprezenta ba komisaun F, hafoin oin iha plenaria mak orsamentu ruma husi Ministériu balun ladun benifisiu bele koloka ba SNAEM atubele sosa ambulánsia.
Iha OJE 2022, orsamentu ne’ebé aloka ba SNAEM,I.P ho montante $1.291.141 no ezekuta ona rihun $774, iha obrigasaun rihun $178 no iha komitmentu $30.400.
Nune’e, iha balansu hela rihun $317 ida ne’e inklui ho saláriu ne’ebé selu funsionariu sira, hahú fulan outubru to’o dezembru hamutuk $174.963.
Husi janeiru to’o setembru Ministériu saúde mak selu salariu funsionariu sira nian, maibé outubru to’o dezembru, SNAEM mak jere rasik ona orsamentu ida ne’e.
Tuir iha livru anexu XI planu anuál ba servisu no entidade setór saúde públiku administrativu ba tinan 2023, Servisu Nasionál Ambulánsia no Emerjénsia Medika iha programa 510, atividade 10, no sub-programa haat, hanesan boa governasaun, jestaun instituisionál, servisu ambulánsia no servisu emerjénsia medika.
Jornalista : Felicidade Ximenes
Editór : Florencio Miranda Ximenes
