Xanana: Kadoras mak futuru Timor-Leste nian
DILI, 15 outubru tinan 2022 (TATOLI) – Oradór Sientífiku atuál Xefe Ekipa Negosiadór Definitiva ba Delimitasaun Fronteira Marítima, José Kay Rala Xanana Gusmao, hateten, kadoras Greater Sunrise mak sai futuru ba povu no nasaun Timor-Leste nian.
Nia hateten ida-ne’e, iha ámbitu semináriu ida kona-ba “futuru tasi Timor nian hosi fronteira marítima ba dezenvolvimentu kosta súl,” ne’ebé Universidade Katólika Timorense organiza mak organiza, sábadu ne’e.
“Tuir ha’u-nia hanoin, futuru Timor-Leste nian mak iha tasi laran, hosi dezenvolvimentu fronteira marítima to’o iha dezenvolvimentu kosta súl nian. Nasaun ne’e presiza dezenvolvimentu ekonómiku no kosta súl, hodi lori kadoras no gás mai Timor-Leste, sai hanesan futuru,” Kay Rala Xanana Gusmao, hateten, iha salaun Nobel da pPás, Kampus Sentrál Universidade Katólika Timorense (UCT), Balide, Dili.
Líder Karismátiku ne’e salienta, projetu ne’e ninia objetivu maka kria dividendu ekonómiku diretu ba populasaun tomak, tantu liuhosi atividade indústria petrolífera no kriasaun empregu hirak-ne’ebé iha relasaun ho sira, ka liuhosi dezenvolvimentu infraestrutura sira hodi apoia dezenvolvimentu kosta súl nian.
Xanana Gusmão kontinua defende implementasaun kadoras gás nian ba kosta súl país nian.
“Karik timor-oan sira determina ona katak ida-ne’e dalan ba oin, ida-ne’e sei la sai Governu sira seluk no sei laiha entidade komersiál sira-ne’ebé mak sei lori ita sees hosi ita-nia dalan, ita-nia vizaun no ita-nia mehi, mak atu harii futuru ida sustentável ba ita-nia nasaun no ita-nia povu,” Xanana dehan.
Xanana Gusmao kestiona kona-ba kapasidade lideransa Timor Gap no ANPM nian sei la garante progresu pozitivu ruma ba Timor-Leste, kona-ba dezenvolvimentu Greater Sunrise nian.
“Lori kadoras mai Timor-Leste presiza vizaun, esforsu barak no abilidade atu dada investimentu. Maibé ida-ne’e depende ba Timor-Leste no la’ós ba ema seluk atu mehi sira-nia mehi rasik no luta ba sira-nia kauza,” eis PR tenik.
Eis Primeiru Ministru hatutan, sé iha dúvida kona-ba dezenvolvimentu ne’ebé presiza iha Timor-Leste, haree de’it ba kresimentu no dezenvolvimentu ekonómiku no sosiál iha Darwin.
Xanana Gusmao afirma, Timor-Leste iha direitu no iha obrigasaun atu dezenvolve Greater Sunrise, hodi fó moris di’ak ba jerasaun aban-bainrua nian.
Xanana Gusmao intende, atuál Primeiru Ministru Austrália, Anthony Albanese, ne’ebé demonstra iha nia komandu, aten-brani no simpatika, kona-ba reklamasaun sira relasiona ho esploitasaun Greater Sunrise nian durante sorumutuk datoluk, foin lalais ne’e.
“Nu’udar sinál boa vontade polítika nian iha kooperasaun, kona-ba respeitu interese nasaun idak-idak nian,” nia hateten.
Jornalista: Osoria Marques
Editór: Evaristo Soares Martins
