BOBONARO, 16 outubru 2022 (TATOLI) – Prezidente Autoridade Munisípiu Bobonaro (AMB), Ernesto de Oliveira Barreto, sei koordena ho Governu Sentrál hodi dezenvolve fatin istóriku Balibo Five sai fatin turizmu hodi atrai vizitór lokál no estranjeira.
Notísia relevante: PR husu komunidade prezerva istória Balibo Five
“Ha’u sei esforsu nafatin no serbisu hamutuk ho Governu Sentrál hodi haree dezenvolvimentu sira iha área istóriku sira hanesan Balibo, bele halo dezenvolvimentu fatin istóriku sai fatin turístiku. Ida-ne’e furak atubele atrai turista internasionál no nasionál mai vizita munisípiu Bobonaro,” nia hateten iha ámbitu komemorasaun trajédia Balibo Five ba dala-47 iha domingu ne’e
Nia akresenta, autóridade munisípiu mos iha planu atu halo dezenvolvimentu ba fatin istoriku sira-ne’e, maibé labele implementa tanba kbiit ne’ebé Governu Sentrál atribui la sufisiente nune’e bainhira tama ona desentralizasaun administrative no podér lokál iha 2023 bele realiza.
“Ho nune’e bele fó rendimentu ekonomia ba ita-nia populasaun no taxa ba munisípiu Bobonaro nian,” nia katak.
Ernesto agradese ba jorrnalista estrajeiru na’in-lima nia dedikasaun tanba esforsu no kontribuisaun ne’ebé sira halo liuhosi divulga informasaun mak mundu internasionál hatene katak povu Timor-Leste hetan torturasaun hosi okupasaun Indonézia.
Nia mós agrade jornalista na’in-lima nia fámilia liuhosi Governu Australia ne’ebé ho laran luak dezenvolve ona otél Balibo sai fatin ne’ebé furak.
Ernesto subliña, jornalista na’in lima ne’e nia isrória mate hakerek ona iha livru barak iha Austrália liuhosi ema sira-ne’ebé mai halo investigasaun kona-bá torturasaun ne’ebé akontese ba sira to’o mate.
Notísia relevante:Balibo Five, “Tim Susi” sunu jornalista na’in-lima to’o mutuk
Jornalista: Sérgio da Cruz
Editór: Evaristo Soares Martins
