Governu lansa monumentu memoriál ‘Liberdade’ iha Balibo
BOBONARO, 16 outubru 2022 (TATOLI)- Governu liuhosi Ministru Prezidénsia Konselu Ministru, Fidelis Manuel Leite Magalhães, domingu ne’e, simbolikamente lansa fatuk dahuluk ba monumentu memoriál ‘Liberdade’ iha postu administrativu Balibo, munisípiu Bobonaro.
Biban ne’e, Ministru Prezidénsia Konsellu Ministru, Fidelis Manuel Leite Magalhães, agradese ba Centro Nasionál Chega (CNC), ne’ebé iha inisiativa di’ak harii ona monumentu ne’e ba jornalista estrajeiru na’in-lima iha trajédia Balibo inklui ema hotu ne’ebé mate tanba liberdade iha Timor-Leste.
Notísia Relevante:Trajédia Balibo Five garante liberdade imprensa iha Timor-Leste
“Obrigadu ba CNC ne’ebé maka aumenta tan inisiativa hodi bele garante atu memoria bele kontinua moris ne’e, hodi ita hotu bele kontinua hetan referensia hosi monumentu sira, atubele hatene istoria pasadu no aprende lisaun pasadu nia ke importante ita bele hakat ho fiar an ho konsiensia ne’ebé kle’an, atu Timor bele hetan futuru ne’ebé diak liu,” nia hateten.
Iha biban hanesan, Konseleiru CNC, Xisto dos Santos, esklarese monumentu ne’e nu’udar sasin ba sofrementu no sakrifisiu ba lia-loos.
“Monumentu memoriál sai sasin ida entre pasadu, prezente no futuru, hodi kontinua hametin ita-nia solidariedade ba sobreviviente no ita hirak ne’ebé daudaun ne’e goza liberdade, solidariedade ba povu Timor no ita-nia belun sira iha Austrália, Nova-Zelándia, Reinu Britániku no mós ba maluk sira hotu, ne’ebé hamrook ba lia-loos, maibé lakon sira-nia vida ba ita nia rai,” nia katak.
Konseleiru CNC ne’e aprofunda monumentu ne’ebé sei hale’u ho jardín ne’e harii atu memoriza moris pasadu ne’ebé dedika sira nia an ba povu Timor-Leste ba ukun rasik-an no balun ne’ebé agora sei moris iha vulnerável hela.
Portantu, monumentu ida ne’e sei asegura mós sofrementu sira ne’ebé akontese iha pasadu, ita mós garante katak sei la akontese tan iha Timor-Leste no mós rai seluk.
“Ita fi’ar katak hafoin ba oin monumentu memoriál ba liberdade ida-ne’e sei la mate no sei moris hosi ohin no ba oin liuliu ba jerasaun foun sira,” nia hatutan.
Monumentu ne’e ho nia medida metru 3×3 ho nia eskada tolu, significa katak Timor-Leste iha kolonializmu tolu hanesan Japaun, Portugués no Indonézia. Enkuantu iha monumentu sei hakerek Bobonaro oan sira ne’ebé mate ba ukun-an, atu nune’e iha loron boot ruma família ruma bele sunu lilin no kari ai-funan,
Partisipa iha serimónia lansamentu ne’e, Vise Ministru Administrasaun Estatál, Lino de Jesus Torrezão, Prezidente Konsellu Imprensa,Virgílio da Silva Guterres ho estrutura, Prezidente Autóridade Munisípiu Bobonaro, Ernesto de Oliveira Barreto, sobreviviente sira, veteranu, jornalista sira, estudante no komunidade.
Notísia Relevente: Balibo Five, “Tim Susi” sunu jornalista na’in-lima to’o mutuk
Jornalista: Sérgio da Cruz
Editór : Florencio Miranda Ximenes
