Arsénio Bano rejeita adisionál millaun $16 iha OJE 2023 ba Ró Haksolok
DILI, 17 outubru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, rejeita informasaun ne’ebé fó-sai hosi mídia balun katak autoridade prevee tán verba adisionál ba Ró Haksolok ho montante millaun $16,9 tanba orsamentu millaun $14 RAEOA sei uza to’o ohin loron.
“Ha’u atu dehan notísia sira sai iha mídia sosiál kona-bá pedidu adisionál Ró Haksolok, ne’e laloos, ami laiha OJE ba 2023 la husu tán orsamentu aumenta ba Ró Haksolok, ha’u la hatene notísia sira-ne’e ba foti hosi ne’ebé. Dala ida tán laiha orsamentu 2023 nian RAEOA husu tán adisionál millaun $16, 9 ba Ró Haksolok, ne’e laiha no laloos,” Arsénio Paixão Bano, informa ba jornalista sira hafoin enkontru ho Primeiru Ministru iha Farol, Dili, segunda ne’e.
Nia afirma, iha 2022 RAEOA la husu orsamentu ba ró Haksolok no 2023 mós hanesan RAEOA la husu, osan ne’e maka iha 2021 aprova millaun $14, RAEOA jere to’o ohin loron, atu gasta no atu lori Ró ne’e mai Timor-Leste atu halo investimentu ba estaleiru hatama fali osan hosi estaleiru ne’e.
Nia informa, durante viajen iha rai-li’ur ho objetivu tolu, iha fiskalizasaun no mós vizita ba Portugál nian, primeiru estaleiru ne’e prontu ona, agora ita atu hahú ona halo rekuperasaun ba Ró ne’e, no mós simu rekomendasaun hosi Ró seluk no parte seluk atu hadi’a sira-nia Ró, no simu investimentu seluk ba Ró ne’e, ne’ebé sasán la’o di’ak hela.
“Ohin ha’u hato’o ba Primeiru Ministru hanesan ne’e, tanba sei hasoru tán Mari Alkatiri, maibé hosi ha’u-nia parte ha’u informa hanesan ne’e de’it, ne’ebé ha’u husu favór lalika hakerek nar-naran osan ba Ró Haksolok, labele halo públika sai dúvida, presiza konsulta didi’ak ho Autoridade RAEOA atu hatene nia prosesu, ha’u husu favór labele inventa dadus ba públiku kona-bá dadus adisionál ba Ró haksolok,” nia husu.
Daudaun RAEOA prepara mós timoroan sira, sei halo rekrutamentu atu tuir formasaun kona-bá tripulante no mós konstrusaun náviu, buka esperiénsia, karik iha futuru harii estaleiru iha Timor, entaun bele iha ema ona atu serbisu no iha ona esperiénsia.
“Ne’e ita sei halo iha tinan ne’e, preparasaun halo daudaun sei ita haruka ba, ita prepara ba futuru Ró ne’e mai ita bele kaer rasik, ho nia orsamentu ba tripulante hamutuk rihun $32, ba formasaun nian,” nia katak.
Entretantu, tuir dokumentu ne’ebé Agencia Tatoli asesu liuhosi livru orsamentu iha Orsamentu Jerál Estadu (OJE) 2023 RAEOA nian propoin millaun $120.
Hosi montante millaun $120 ne’e, komposta hosi millaun $84 ba administrasaun iha rejiaun no millaun $36 prevee iha Fundu Espesiál ba Dezenvolvimentu (FED). Hosi millaun $36 ne’e inklui rihun $32 ne’e ba formasaun futuru tripulante Ró Hakoslok nian.
Notísia relevante: Alkatiri: “Ita hahú prepara tripulante ba Ró Haksolok”
Jornalista: Abílio Elo Nini
Editór: Evaristo Soares Martins
