Juventude 18 hosi Suku Maluru partisipa formasaun konaba Planta LNG iha Indonézia
VIQUEQUE, 17 outubru 2022 (TATOLI)— Juventude hamutuk na’in-18 hosi suku Maluro, Beaço, munisípiu Viqueque partisipa iha formasaun tékniku profesionál área manutensaun óleu no gás iha Indonézia.
“Iha loron 14 outubru 2022, TIMOR GAP E.P ho PT. Badak LNG selebra ona kontratu ida kona-ba formasaun tékniku profisionál iha área manutensaun óleu no gás nian ne’ebé foka liu ba Mechanical, Electrical no Instrumentation (sigla Inglés) Planta LNG ba Juventude na’in 18 husi Suku Maluru-Beaço, Munisípiu Viqueque, ne’ebe tuir formasaun iha Indonézia”, haktuir komunikadu impresa hosi Timor GAP, Empreza Públiku (Timor GAP, EP), ne’ebe Agência Tatoli asesu, segunda ne’e.
Iha karta ne’e isplika, hosi juventude na’in 18 ne’e kompostu husi feto na’in haat (4) no mane na’in 14 (sanulu resin-haat) husi Suku Maluru-Beaço, Munisípiu Viqueque.
Kontratu ida-ne’e selebra iha loron 03 outubru 2022, iha salaun konferénsia PT. Badak nian iha Bontang – Kalimantan Timur, Indonézia. Hafoin remata formasaun iha Centro Nacional de Emprego e Formação Profissional (CNEFP) iha fulan jullu 2022, juventude 18 hirak ne’e kontinua formasaun iha área espesializadu ne’ebé mensiona iha leten iha PT. Badak LNG, Bontang – Indonézia.
Programa formasaun ida-ne’e fahe ba faze prinsipál tolu (3) hanesan Classroom session/Basic Training, On the Job Training (OJT) no Job Specific Training (JST)/Hands-on Training.
Formasaun refere sei hala’o durante fulan sia (9). Kritériu atu hetan Sertifikadu husi formasaun ida-ne’e mós liuhusi prosesu ne’ebé rigorozu, tan ne’e, juventude/formadu hirak ne’e tenke pasa ho valór liu husi 75%.
Objetivu husi formasaun ne’e nu’udar kontinuasaun formasaun ne’ebé formadu sira antes ne’e tuir ona kursu báziku numériku no abilidade ba servisu hanesan soldadura, kanalizasaun, no eletrifikasaun/instrumentasaun iha CNEFP, Tibar.
Aleinde ne’e, formasaun ida-ne’e mós atu hakle’an juventude/formadu sira-nia koñesimentu no kapasidade ne’ebé sira sei aplika diretamente iha sira-nia abilidade ba iha indústria mina no gas liu-liu servisu iha planta LNG ne’ebé sei harii iha Beaço, Munisípiu Viqueque.
Kontratu ne’ebé asina hanesan provas ida hodi realiza kompromisu husi Ministériu Petróleu no Minerais liu hosi TIMOR GAP, E.P ho PT. Badak LNG hodi fasilita juventude na’in 18 iha programa formasaun profisionál, ho durasaun tempu tuir kontratu sei hala’o durante fulan sia (9) iha Bontang – Kalimantan Timur, Indonézia.
Jornalista :Vitorino Lopes da Costa
Editóra : Armandina Moniz
