Ministeriu Financas Diresaun Estatistika fo formasaun ba diretór sira iha liña ministerial
VIQUEQUE, 17 outubru 2022 (TATOLI)- Ministeriu Financas liu hosi Diresaun Gerál Estatistika (DGE) fó kapasitasaun formasaun ba diretór sira iha liña ministerial. Formasaun ne’e halao hodi hasae koñesementu diretór sira kona-ba prosesu rekolla dadus ho lolos iha munisípiu Viqueque.
Diretór Sistema iha DGE, Silvino Lopes hateten, objetivu hosi formasaun ne’e atu hasae koñesementu diretór sira iha liña ministeriál kona-ba prosesu rekolla dadus ho lolos.
“Formasaun ne’e ita bolu refreshing training. Formasaun ne’e realiza ona iha fulan haat liu ba, agora ami fó tan formasaun hanesan ba diretór sira iha liña ministeriál . Tanba, ita presiza hasae koñesementu diretór sira atu bele koñese saida mak benifísiu ka importansia hosi dadús refere,” Silvino Lopes, hateten ba jornalista sira iha postu Administrativu Viqueque Villa, segunda ne’e.
Tanba ne’e nia dehan atu kria planu ruma tenke bazeia ba evidensia dadús. Tanba ne’e, DGE fó formasaun ba diretór liña ministeriál sira hodi partisipa hotu iha formasaun ida ne’e.
“Tan ne’e, Diretór sosial, edukadaun, no saúde oinsa maka sira bele rekolla dadús ho kualidade. Bainhira ita atu kria planu, maibé dadús laiha maka planu sei lala’o. Ita halo dezenvolvimentu ruma iha suku presiza mos dadus hafoin bele implementa”, nia akresenta.
Nune’e nia husu, diretór no xefe departamentu sira tenke partisipa masimu hodi bele fornese dadús ne’ebé loos ba autoridade sira iha munisípiu Viqueque.
Iha fatin hanesan Adiministradór Munisípiu Viqueque, Januario Soares “Bolly”, hateten liu hosi formasaun ida-ne’e hodi hasa’e diretór sira-nia koñesementu nune’e ba futuru kada diresaun ida-idak bele serbisu ho di’ak.
“Ha’u hanoin formasaun ne’e importante tebes hodi bele hasa’e resposabilidade kada ministeriál liuliu hodi rekolla dadús diresaun ida-idak nian”, nia hato’o.
Atividade formasaun ne’e DGE hetan suporta hosi UNFPA. Formasaun refere halao durante loron lima hahú segunda no sei ramata iha sesta. Formadór sira hosi DGE no hetan partisipa hosi diretór liña ministerial sira no xefe Polísia Nasionál Timor-Leste munisípiu Viqueque liu hosi Unidade Ema Vuneravel (PNTL-VPU) iha munisípiu Viqueque.
Jornalista : Vitorino Lopes da Costa
Editóra : Armandina Moniz
