DILI, 17 outubru 2022 (TATOLI) – Primeiru Ministru, Taur Mata Ruak, orienta Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano atu forma ekipa tékniku hodi deskuti kona-bá asuntu zona free trade iha fronteira entre Nusa Tenggara Timur (NTT) no rejiaun ne’e.
“Ohin mai hasoru Primeiru Ministru, fó orientasaun ba RAEOA atu harii nia grupu tékniku rasik atu estuda prepara asuntu free tradezon ne’e, free tradezon nia problema hanesan ne’e, ita foin mak deskuti balu pesimista ona katak buat ne’e labele la’o, entaun buat kuandu ita la halo oinsá mak nia atu la’o, entaun orientasaun ohin ami sei prepara,” Arsénio Paixão Bano, informa ba jornalista sira hafoin remata enkontru ho Primeiru Ministru iha Farol, Dili, segunda ne’e.
Nia afirma, RAEOA foin mak atu konstitui grupu téknika atu trata asuntu ne’e, bele ka lae iha área sira-ne’e, ema balu hanoin ita la’o tiha ona, katak ne’e sei laiha vantajen, ne’e sala boot.
“PM foin fó orientasaun ba ha’u atu prepara forma ekipa tékniku, tanba RAEOA tenke prepara rasik, grupu tékniku iha nasionál ita hatene ona diskusaun la’o daudaun ho Indonézia. Ne’e foin mak diskusaun dahuluk, seidauk asina, ne’ebé ha’u husu ba públiku, husik ita serbisu tenke hanoin pozitivu maka di’ak, ba Oé-Cusse atu di’ak, parte tékniku maka sei rezolve” nia afirma.
Jornalista: Abílio Elo Nini
Editór: Evaristo Soares Martins
