Proposta OJE 2023: MTK prevee millaun $11-resin finansia programa lima

DILI, 17 outubru 2022 (TATOLI)–Ministéiru Transporte no Kmunikasaun (MTK) iha proposta Orsamentu Jerál Estadu (OJE) 2023 prevee $11,558,253 hodi finansia programa lima.
“OJE 2023, MTK prevee $11,558,253 hodi finansia programa lima, sub-programa 12 no atividade 44,” Ministru Transporte no Komunikasaun (MTK), José Agostinho, hateten bainhira halo audiénsia públika ba proposta OJE 2023 ho komisaun C trata asuntu Finansa Públika iha Parlamentu Nasionál, segunda ne’e.
MTK atualiza progresu ezekusaun OJE 2022 hosi montante inisiál $11,534,455 ne’ebé ho kategória saláriu vensimentu millaun $2-resin, bens serbisu millaun $4-resin, kapitál menór rihun $5, kapitál dezenvolvimentu millaun $1-resin, transferénsia públika millaun $3-resin.
José Agostinho hateten, ekezusaun bazea ba sistema free balance to’o iha 11 outubru ne’e ho ninia progresu iha kategória kompromisu totál orsamentu millaun $2-resin ekivalénsia 19,75%, obrigasaun totál orsamentu millaun $1-resin, no atuál case pagamentu millaun $6-resin (54,11%) ho totál ezekusaun millaun $9-resin (82,18%) no hosi progresu ezekusaun ne’e sei iha balansu millaun $2-resin.
Hosi dotasaun orsamentu 2022 ne’ebé mak iha, MTK realoka nia reseita ba kofre Estadu depois ho ezekusaun orsamentu ne’ebé iha MTK konsege rekolla fila-fali reseita kada dirasaun administrativu direta no indireta ne’ebé tutela iha MTK, hosi janeiru-setembru tinan ne’e rekolla reseita hanesan hosi Dirasaun Nasionál Transporte Terrestre (DNTT) millaun $2-resin, Dirasaun Nasionál Infraestrutura rihun $46-resin, Dirasaun Nasionál Serbisu Postál rihun $10-resin, ANATL, E.P rihun $805-resin, APORTI , I.P millaun $3-resin, Autoridade Nasionál Komunikasaun (ANC) millaun $2-resin, Autoridade Aviasaun Sivíl Timor-Leste I.P rihun $10-resin.
Bazea ba livru orsamentál planu anuál iha 2023, MTK iha programa transporte prevee $2,688,735 ho sub-programa jere integrasaun seguransa no dezenvolvimentu rejionál transporte terrestre ho atividade lima, sub-programa infraestrutura transporte terrestre ho atividade lima, sub-programa transporte marítima ho atividade haat.
Programa boa-governasaun no jestaun instituisionál prevee $5,818,318 ho sub-programa haat no atividade 13.
Programa portu prevee $448,776 ho sub-programa insfraestrutura marítima ho atividade ida.
Programa igualidade jeneru no inkluzaun sosiál prevee $40,280 ho sub-programa ida no atividade lima.
Programa teknólojia informasaun no komunikasaun prevee $2,289,565 ho sub-programa fornesimentu komunikasaun efisiente seguru no asesivél ba Governu ho kapasidade sufisiente ho atividade tolu, sub-programa jestaun kualidade informasaun serbisu metrolojia ho atividade tolu, sub-programa jestaun integrasaun infraestrutura no rede serbisu postál ho atividade haat.
Jornalista : Nelson de Sousa
Editór : Cancio Ximenes

