SMJMT Covalima kontribui reseita $2,250.55 ba kofre Estadu
COVALIMA, 17 outubru 2022 (TATOLI)—Diretór Servisu Munisipál Jestaun Merkadu no Turizmu (SMJMT) Covalima, Vitorino do Carmo, hateten hahú hosi janeiru to’o setembru ne’e SMJMT kontribui ona reseita $2,250.55 ba kofre Estadu ne’ebé konstribui mai hosi kliente sira-ne’ebe monta publisidade.
“Durante fulan sia hahu hosi fulan janeiru to’o setembru tinan ne’e, Servisu Munisipál Jestaun Merkadu no Turizmu (SMJMT), ami kontribui reseita $2,250.55 ba kofre Estadu liuhosi publisidade,” Vitorino do Carmo hato’o ba Agência Tatoli, iha Bairru Costa, segunda ne’e.
SMJMT kontribui reseita liuhosi publisidade ho tipu sira hanesan fatin públiku avenida, rua avenida, travesa no beco, ne’ebé kliente sira monta publisidade hodi selu ba Estadu.
Kliente sira selu publisidade bazea ba Avenida kada metru haree ba loron no tinan ida ho nia presu sentavus 0.50, rua avenida ne’e selu sentavu 0,40 haree mós loron no tinan, travesa no beco ne’ebé sei mutiplika 25% hosi osan ne’ebé mak iha.
Prosesu atu monta publisidade sira iha Covalima sira tenke foti formuláriu iha Servisu Munisipál Jestaun Merkadu no Turizmu (SMJMT) ne’ebé asina hosi Administradór Munisípiu Covalima Francisco de Andrade.
Hafoin asina hosi administradór Covalina, kliente sira sei selu direta ba iha Banku Nasionál Komérsiu Timor-Leste (BNCTL. Sigla portugés) sukursál munisípiu Covalima.
Jornalista : Celestina Teles
Editór : Cancio Ximenes
