COVALIMA, 17 outubru 2022 (TATOLI)—Diretór Servisu Munisípál Asaun Sosiál Covalima, Abrão Nascimento informa, durante trimestre datoluk tinan 2022 ne’e, Servisu Munisipál Asaun Sosiál (SMA) apoiu ona kaixaun 75 ba família matebian vulneravél iha Covalima.
“Hahú fulan-jullu to’o setembru tinan 2022, ami apoiu ona kaixaun 75 ne’ebé ho medida kaixasaun hanesan medida kaixaun boot 53, naton 14 no kiik-liu hamutuk ualu (8) ba família matebian b vulneravél iha Covalima,” Abrão Nascimento relata ba Agência Tatoli iha Bairru Costa, segunda ne’e.
Ho nune’e ba trimetre datoluk Servisu Munisipál Asaun Sosiál gasta osan hosi sosa kaixaun ho medida boot, naton no kiik ba família matebian ne’ebé mak vulneravél ne’ebé osan hamutuk $10,820.00.
Kaixaun hirak ne’e ho nia medida sira hanesan ba ema boot ho sentimetru 140 x 200 ne’ebé kada kaixaun ho nia orsamentu $170.00, nune’e kaixaun 53 ba ema boot gasta ona osan $9,010.00.
Kaixaun ho medida naton ho sentimetru 90-130 ne’ebé kada kaixaun ho nia presu $95.00, nune’e total kaixaun hamutuk 14 ne’ebé gasta ona osan $1,330.00.
Kaixaun medida kiik ho sentimetru 60-80 ne’e hamutuk ualu (8) ho nia presu kada kaixaun $60.00 ne’ebé gasta osan osan $480.00.
Diretór ne’e mós fó sai dadus durante ne’e, fó apoiu kaixaun barak liu ba iha postu administrativu sira hanesan postu Suai mak barak tanba besik área kompañia ne’ebé mak halo kaixaun, postu id atuir mak Zumalai maske distánsia dook maibé estrada di’ak, hafoin postu Maucatar no Tilomar.
“Ita bele hatete postu administrativu ne’ebé menus apoiu kaixaun ba família matebian vulneravél sira mak hanesan Fohorem, Fatumea no Fatululik ho razaun primeiru lori pedidu mai iha SMAS maibé hasoru difikuldade atu transporta kaixaun tenke buka transporte rasik,” nia hateten.
Jornalista : Celestina Teles
Editor : Cancio Ximenes
