Asistente Sekjer ONU: UNDP sei investe edukasaun iha rai-laran
DILI, 18 outubru 2022 (TATOLI)-Asistente Sekretáriu Jerál Organizasaun Nasaun Unida (ONU), Kanny Wignaraja, tersa ne’e, iha nai vizita dahuluk hasoru malu ho Prezidente Repúblika (PR), José Ramos Horta, ko’alia kona-ba área importante mak United Nations Development Programme (UNDP) sei apoiu no investe liután iha edukasaun iha rai-laran.
“Ha’u hetan priviléjiu ohin dader atu hasoru malu ho Prezidente Repúblika no ita ko’alia kona-ba buat barak importante liu ba futuru Timor no saida mak sai prioridade prinsipál ba investimentu. Ha’u hanoin hosi Prezidente nia pontu de vista no UNDP apoiu tebes nesesidade atu investe liután iha edukasaun iha rai-laran,” Asistente Sekretáriu Jerál ONU ne’e hateten ba jornalista hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Kanny Wignaraja hatutan, sorumutu ne’e ko’alia mós adezaun Timor-Leste ba organizasaun Association of Southeast Asian Natinos (ASEAN) no Organizasaun Mundiál Komérsiu (OMK).
“Ha’u hanoin katak adezaun ba ASEAN no OMK ida-ne’e mak nakloke oportunidade barak ba Timor-Leste no importante liu mak atrai investimentu estranjeiru ba nasaun,” nia dehan.
Maibé, Kanny Wignaraja hateten, ida-ne’e la’ós buat ne’ebé fasil liu atu halo maibé hanoin área importante sira atu dada investimentu estranjeiru direta mak atu asegura, nune’e mós iha Estadu direitu ne’e forte iha reforma legál no kapasidade judisiál nasaun ne’e.
Maibé, atu kontinua investe liután mós ba kapasidade ema-nian iha nasaun joven ida-ne’e, infraestrutura umanu no sosiál.
“No agora ha’u hanoin nesesidade atu investe liután iha infraestrutura umanu no sosiál. Ha’u hanoin katak saida mak sei lori nasaun ida-ne’ e ba oin,” nia dehan.
Jornalista : Nelson de Sousa
Editór : Cancio Ximenes
