FVTL sei realiza liga voleiból terseira divizaun iha munisípiu sira
BOBONARO, 18 outubru 2022 (TATOLI) – Prezidente Federasaun Voleiból Timor-Leste (FVTL), Inocêncio Araújo da Silva, fó-sai katak, iha tempu badak sei realiza liga voleiból terseira divizaun iha munisípiu sira ba époka 2022.
Notísia relevante: SEJD aloka $50.000 ba FVTL realiza liga voleiból
“Iha tempu besik Federasaun Voleiból Timor-Leste atu loke liga voleiból tereseira divizaun iha munisípiu, depois teseira divizaun se mak sai kampiaun sei ba tuir segundu divizaun iha Dili, kuandu nia kampiaun sei ba primeiru divizaun,” nia informa ba jornalista sira iha Jináziu Maliana, tersa ne’e.
Nia dehan, jogu ne’e sei implementa iha munisípiu hamutuk 10 atubele ba kompete iha nasionál ba kategória feto no mane.
“Sira mane ekipa tolu no feto ekipa rua mak sei sa’e, jogu ne’e open, joven adultu sira depende ba ninia prestasaun, labele buka fali ferik ho katuas ida ba joga, tanba joga ne’e alta prestasaun,” nia hateten.
Ne’e duni Prezidente ne’e akresenta parte federasaun hala’o ona formasaun ba arbitrajen no treinador sira iha munisípiu 10, no daudaun ne’e fasilita hela iha munisípiu Bobonaro ba treinador na’in-30 no arbritu na’in -20 durante loron lima.
Nia dehan, formasaun ne’e atu prepara treinadór no arbitrajen sira iha nivél bázika (D). Hosi ida-ne’e treinadór sira bele kontinua fó formasaun ba komunidade no liuliu joven sira iha baze no nível eskolár.
Ekuantu ba arbritrajen sira atubele responde ba jogu komunitária sira-ne’ebé la’o hela iha munisípiu no postu administrativu sira.
“Durante ne’e ita hatene jogu komunitáriu sei disputa hela ho regra voleiból nian, entaun ita fó formasaun nune’e bainhira iha jogu komunitária ne’ebé governu investe iha prezidente autoridade sira bele iha kualidade atu lidera jogu,” nia esplika.
Responsavél FVTL ne’e hatutan, atividade formasaun ne’e parte ida atu responde ba polítika VIII Governu Konstitusionál liuhosi Sekretaria Estadu Joventude no Desportu (SEJD) nian katak desportu tenke mai hosi baze.
“Entaun ita tenke kria rekursu iha baze atubele hetan kualidade ba dirije jogu sira ho di’ak liután, formasaun ne’e hotu ita mós sei fó bola,” nia fundamenta.
Notísia relevante: FVTL hahú fó formasaun ba treinadór no arbitrajen voleiból
Jornalista : Sérgio da Cruz
Editór : Evaristo Soares Matins
