iklan

KAPITÁL, POLÍTIKA

MSSI entrega karreta funeráriu rua ba AMD tula mate-isin

MSSI entrega karreta funeráriu rua ba AMD tula mate-isin

Karreta Funeráriu tula mate-isin Fernando do Rego ba Uatulari, segunda (03/05/21). Imajen Tatoli/Felicidade Ximenes.

DILI, 18 outubru 2022 (TATOLI)—Governu liuhosi Ministériu Solidariedade Sosiál no Inkluzaun (MSSI) iha 11 outubru 2022 ne’e entrega ona karreta funeráriu rua (2) ba Autoridade Munisípiu Dili (AMD) hodi halo atendimentu ba tula mate-isin iha munisípiu Dili.

Xefe Departamentu Asaun Sosiál iha Autoridade Munisípiu Dili, Fidelis Araújo, hateten durante servisu asaun sosiál la’o bazea ba dekretu-lei númeru 03/2016 ne’ebé altera fali ba dekretu-lei númeru 09. Ho ida-ne’e servisu ne’ebé Ministériu Solidariedade Sosiál no Inkluzaun (MSSI) entrega ona ba iha Autoridade Munisípiu Dili hahú iha 2016 la’o hela to’o agora, maibé, tanba kestaun iha momentu ne’ebá MSSI fó karreta funeráriu rua (2) maibé ida-ne’e la sufisiente atu atende komunidade iha munisípiu Dili.

“Entaun, haree ba orsamentu 2021 nian ne’ebé mak Autoridade Munisípiu Dili tau hodi hola karreta funeráriu foun rua (2), atu nune’e bele reforsa tan atendimentu tula mate isin hosi ospitál ba uma, uma ba igreza no igreza ba haloot iha semitériu sira. Ho ida-ne’e, agora daudaun karreta funeráriu sia iha Autoridade Munisipál Dili hamutuk haat (4), ne’ebé karreta funeráriu rua (2), durante ne’e MSSI mak utiliza hela. Maibé iha 11 outubru 2022, MSSI entrega ona karreta funeráriu rua (2), entaun tula mate-isin iha Autoridade Munisipál Dili hamutuk haat (4), hodi nune’e bele halo atendimentu ba tula mate-isin sira iha munisípiu Dili,” Fidelis Araújo hateten ba Agência Tatoli iha nia kna’ar fatin Dili, tersa ne’e.

Tuir orientasaun, karreta funeráriu haat (4) ne’e halo sirkulasaun iha Dili de’it, tuir fronteira Dili hanesan iha Metinaro ba liu to’o aldeia Lebtunu no Balibar to’o aldeia Tankai no ba fali postu Dom Aleixo to’o de’it iha Comoro aldeia 12 Outubru, fatin ita bolu Tasi-Tolu.

Karreta funeráriu rua ne’ebé iha Autoridade Munisípiu Dili antes ne’e Munisípiu Dili hola iha tinan 2021 ne’e seidauk uza tanba sei halo hela rodazen, no AMD halo hela koordenasaun oinsá servisu sira-ne’e bele entrega mai iha munisípiu Dili.

Kona-ba mate-isin tula ba munisípiu, nia hateten, mate-isin sira-ne’ebé atu transporte ba munisípiu sira, ida-ne’e tenke liuhosi MSSI tanba MSSI agora daudaun toma konta hodi haree mate-isin sira ba munisípiu no mate-isin sira iha munisípiu Dili, MSSI la toma responsabiliza ona.

Enkuantu, MSSI ho Autoridade Munisípiu Dili sempre iha liña koordenasaun karik volume mate ba munisípiu sira mak aas liu, MSSI husu apoiu hosi Autoridade Munisípiu Dili mak sei apoiu MSSI atu bele transporta mate-isin sira ba munisípiu sira.

Hosi ne’e, iha Dili nafatin halo atendimentu ba tula mate-isin iha 24 oras, hanesan ba komunidade ne’ebé familia balun mate iha Hospitál, Klínika no Sentru Saúde sira, bainhira hetan kontaktu, tanba Autoridade Munisípiu Dili mós tau ona oráriu pikete tula mate isin hanesan motorista sira-nia naran ho númeru telefóne.

“Iha mortuáriu ami tau ona informasaun ka avizu iha ne’ebá, tanba ne’e informasaun sira taka ona iha kuadru avizu, nune’e oráriu pikete ba motorista nian hosi segunda to’o domingu. Segunda loron ne’e, motorista na’in rua (2) iha ne’ebá ho naran no númeru telefóne, hanesan mós iha segunda kalan motorista rua (2), ho naran ho númeru kompletu iha ne’ebá. Entaun, karik motorista sira-ne’ebé pikete mak ita kontaktu mak telefone mate bele liga fali ba ha’u hanesan Xefe Departamentu bele mós ba Sekretáriu Autoridade Munisípiu Dili,” nia dehan.

Nune’e nia apela ba komunidade hotu, atu haree informasaun ka avizu sira-ne’ebé Autoridade Munisípiu Dili fahe hela ba Autoridade Lokál sira, atu nune’e karik familia ruma mate, bele haree númeru telefóne no informasaun ne’ebé AMD fó ba taka iha suku sira.

“Família ruma mate atu presiza dokumentu ruma no guia do obitu, iha avizu iha ona, tanba ne’e ami husu ba komunidade atu asesu informasaun sira, hodi bele hakle’an no karik família mate bele kontaktu tuir dalan no atendimentu ne’ebé halo hosi Autoridade Munisípiu Dili no MSSI,” nia dehan.

Jornalista : Nelia Fernandes

Editór       : Cancio Ximenes

 

iklan
iklan

Leave a Reply

iklan
error: Content is protected !!