OJE 2023: MF prevee millaun $26-resin finansia programa rua

DILI, 18 outubru 2022 (TATOLI)—Ministéiru Finansa (MF) iha proposta Orsamentu Jerál Estadu (OJE) 2023 prevee $26,401,967 hodi finasia programa rua.
“Iha orsamentu 2023 ne’e, Ministéiru Finansa prevee millaun $26.4 ho nia programa rua mak jestaun finansa públika ho boa-governasaun no jestaun instituisionál,” Vise Ministru Finansa, António Freitas, hateten bainhira hala’o audiénsia públika ba proposta OJE 2023 ho komisaun C no F iha Parlamentu Nasionál, tersa ne’e.
António Freitas, hatutan MF nia papél importante ne’ebé responsável ba konsensaun ezekusaun koordenasaun no avaliasaun polítika iha área planeamentu no monitorizasaun anuál ba orsamentu, finansa públika, estatístika no jestaun patrimóniu Estadu.
Nune’e, nia esplika, kompete baze programa MF nian ba tinan oin mak reforma jestaun finansa públika, enkuadramentu legál, sistema informátika, infraestrutura, rekursu umanu.
“Ba tinan oin dentru programa rua ne’ebé iha pilár haat importante mak atu fó kontinuasaun ba hadi’a enkuadramentu legál nune’e haree atu halo revizaun ba lei tributária ho Alfandega,” nia dehan.
Nia hatutan, sistema informátika sai komponente ida importante liu-liu atu mellora di’ak liután ekipamentu no sistema ne’ebé mak iha MF, implementasaun date center desastre recovery instalasaun no kontinua haree ba lisensa sira-ne’ebé laiha ligadu ho sistema ne’ebé utiliza iha MF hanesan GPRS, sictos ho Asycuda.
“Kontinua sosa ekipamentu audio vizuál sira inklui screaning sira-ne’ebé fó suporta ba prestaun iha MF, atualizasaun sistema atendimentu tributária ho ALFANDEGA,” nia dehan.
Iha komponente estrutura MF hosi kontinua fó prioridade liu-liu instalasaun mákina x-ray iha fronteira ho aeroportu no konstrusaun fasilidade sira hanesan dormitóriu no edifísiu iha fronteira no rebalitasaun edifísiu estatístika iha munisípiu balun.
Ba iha rekursu umanu sai hanesan kontinua dezenvolve instrumentu kapasitasaun iha área jestaun finansa públika liu-liu área ne’ebé espesializadu, no kontinua rekrutamentu funsionáriu kazuál ho kategória espesialista iha área planeamentu, orsamentu, aprovizionamentu ho seluk tan no partisipa mós formasaun hala’o iha nivél globál ho rejionál.
Tuir livru orsamentál planu annual 2023, MF iha Programa jestaun finansa públika prevee $16,222,943 ho sub-programa mobilizasaun jestaun rekursu externu ho atividade neen, sub-programa arekadasaun impostu no taxa ho atividade neen, sub-programa administrasaun fundu petróleu ho atividade rua, sub-programa publikasaun estratéjika no analiza ekonómiku polítiku no fiskál ho atividade neen.
Nune’e mós iha sub-programa jestaun patrimóniu Estadu ho atividade neen, sub-programa reforma finansa públika no patrimóniu Estadu ho atividade haat, sub-programa ezekusaun orsamentál no prestasaun konta ho atividade 11, sub-programa planeamentu no orsamentu ho atividade haat.
Programa boa-governasaun no jestaun instituisionál prevee $10,179,024 ho sub-programa rua no atividade hitu.
MF aprezenta forsa traballu daudaun ne’e iha funsionáriu públiku 634, kontratadu 339, asisténsia tékniku nasionál 80 no asisténsia téknika internasionál 17.
Enkuantu tuir portál transferénsia fó sai iha loron tersa ne’e (18/10/2022) OJE 2022 MF ho orijen $29,869,289.00, kompromisu sira $5,778,310.86, obrigasaun sira $5,992,500.19, atuál $11,284,785.59, saldu $6,813,692.36 no ezekusaun 57.8%.
Notísia Relevante: https://tatoli.tl/tag/mf-prioritiza-programa-jestaun-finansa-publika-iha-oje-2022/
Jornalista : Nelson de Sousa
Editór : Cancio Ximenes

