VIQUEQUE, 18 outubru 2022 (TATOLI)– Sekretáriu Estadu Juventude no Desportu (SEJD), Abrão Saldanha, husu formadór Ikatan Kera Sakti (IKS) iha munisípiu Viqueqeu atu asumi responsabilidade hodi eduka membru sai ema ne’ebé di’ak.
“Ha’u husu formadór sira tenke iha responsabilidade hodi eduka ema ida sai ema ne’ebé di’ak, tanba ne’e nu’udar formadór ita-boot sira ninia papel atu eduka. Ho ida-ne’e maka ha’u mai hodi fó edukasaun ba formadór sira. Ha’u mós agradese ba IKS Viqueque ne’ebé foti inisiativa fó formasaun ba treinadór sira”, Abrão Saldanha hateten liu hosi ninia diskursu iha serimónia abertura ba treinadór IKS Viqueque, iha kampu demokrasi Viqueque, tersa ne’e.
Abrão Saldanha, hatutan governu kria polítika hodi reativa organizasaun arte marsial no re-integra ba sistema nasionál desportu nune’e organizasaun sira hotu ne’ebé existe iha Timor-Leste (TL) sai hanesan atividade desportiva ida.
“Ha’u dehan ba líder organizasaun arte marsial sira katak prosesu reativa ne’e fasil, difisil liu maka re-organiza. Maibé, organizasaun IKS hahú ho dalan loos atu organiza fila fali no sira foka uluk ona ba treinadór sira,” governante ne’e hato’o.
Nia dehan iha nasaun demokratiku ema hotu-hotu espresa sira-nia talentu liu hosi arte marsial membru organizasaun no sira nafatin hatudu ba públku katak organizasaun la’ós kriminozu. Treinu hodi defende ba lia loos no defende ema ne’ebé laiha forsa.
“Arte marsial la hanorin proteje família sira ne’ebé halo sala, haree uluk família halo loos ka la’e. Imi salva mós ema ne’ebé fraku, la’os imi halo fali ema sira fraku maka sai vítima. Iha kapasidade hodi halo auto defeza no tenki kombate ida-ne’e maka naran arte. Ida ba tuda malu, no taa malu ne’e ninia arte laiha,” dehan nia.
Iha fatin hanesan Prezidenti Komisaun Reguladór Arte Marsial (KRAM), Octavio Conceção Lou, husu treinadór organizasaun IKS hodi foti responsabilidade hodi halo kontrola ba membru sira kada klube sira existe iha munisípiu Viqueque.
“Liu hosi formasaun ida-ne’e hodi bele eduka treinadór sira, atu sira bele iha koñesementu hodi eduka sira-nia membru. Formasaun ne’ebé ita realiza ba treinadór sira-ne’e hodi asumi responsabilidade ba klube sira ka la’e,” nia dehan.
Formasaun ba treinadór IKS munisípiu Viqueque hodi rekonstrui mentalidade no espiritualidade, siviku, edukativu, no tekniku ba sidania, hodi produs treinadór sira iha IKS munisípiu Viqueque.
Tema ba formasaun maka “Defende no promove talentu hodi harií pás no establidade liu-liu tane aás interese soberanu RDTL ho paradigma foun iha sosiadade. Formasaun ne’e halao durante loron lima hahú segunda to’o sesta.
Serimónia abertura formasaun ne’e ba hetan partisipasaun hosi autoridade munisípiu Viqueque, Polísia Nasionál Timor Leste (PNTL) munisípiu Viqueque, reprezenta veteranu no membru organizasaun IKS munisípiu Viqueque.
Jornalista: Vitorino Lopes da Costa
Editóra : Armandina Moniz
