Governu aprova Konvensaun Multilaterál Seguransa Sosiál CPLP
DILI, 19 outubru 2022 (TATOLI) — Governu liuhosi reuniaun Konsellu Ministru (KM), kuarta ne’e, aprova ona projetu kona-ba Konvensaun Multilaterál ba Seguransa Sosiál hosi Komunidade País Lian Portugés (CPLP, sigla portugés).
Konvensaun Multilaterál ba Seguransa Sosiál hosi CPLP, aprezenta hosi Vise-Ministru Negósiu Estranjeirus no Kooperasaun (MNEK), Julião da Silva.
“Ohin Konsellu Ministru aprova Konvensaun Multilaterál bá Seguransa Sosiál hosi CPLP, proposta ne’e, ida sei haruka ba Parlamentu Nasionál hodi aprova ka ratifika”, Ministru Prezidénsia Konsellu Ministru, Fidelis Manuel Leite Mangalhães, dehan hafoin Konsellu Ministru, iha Palásiu Governu.
Nia dehan, Konvensaun Multilaterál ba Seguransa Sosiál hosi CPLP ne’e nu’udar akordu internasionál ida ne’ebé ninia objetivu mak atu proteje traballadór sira hosi nasaun signatáriu sira ida-idak ne’ebé servisu iha rai-liur.
Hodi permite katak durasaun tempu serbisu nian tenke sura mós, la haree ba nasaun ida ne’ebé ezerse ninia funsaun sira durante ninia vida ativa, hodi evita lakon tempu iha karreira kontributiva no mós benefisia kontajen ba prazu sira kona-ba garantia atu hetan asesu ba prestasaun sosiál sira ne’ebé konvensaun ne’e abranje protesaun iha invalidéz otas ferik-katuas no mate.
Jornalista : Arminda Fonseca
Editór : Zezito Silva
