Governu aprova konvensaun seguransa sosiál entre Timor-Leste no Portugál
DILI, 19 outubru 2022 (TATOLI) — Reuniaun Konsellu Ministru, kuarta ne’e, aprova ona projetu konvensaun entre Timor-Leste no Repúblika Portugés kona-ba seguransa sosiál, ne’ebé aprezenta hosi Ministra Solidaridade Sosiál no Inkluzaun (MSSI), Armanda Berta dos Santos.
“Ohin ita aprova ona konvensaun entre Repúblika Timor-Leste no Repúblika Portugés kona-ba seguransa sosiál ne’ebé proposta ne’e sei haruka ba Parlamentu Nasionál hodi aprova”, Ministru Prezidénsia Konsellu Ministru, Fidelis Manuel Leite Mangalhães, relata hafoin reuniaun Konsellu Ministru, iha Palásiu Governu.
Nia dehan, konvensaun entre Repúblika Timor-Leste no Repúblika Portugés kona-ba seguransa sosiál ne’e abranje traballadór no sidadaun nasionál sira hotu hosi nasaun rua ne’e, inklui rejime seguransa sosiál kontributivu no la kontributivu nian.
Ministru afirma objetivu fundamentál hosi konvensaun seguransa sosiál ne’e mak totalizasaun hosi períodu kontributivu ne’ebé kumpre hosi país rua ne’e, hodi permite “sura hamutuk” tempu servisu no deskontu nian ba seguransa sosiál iha país rua ne’e, atu kumpre prazu garantia nian hodi hetan asesu ba prestasaun sosiál rejime kontributivu nian.
Nune’e mós, atu asegura tratamentu hanesan sidadaun país rua ne’e nian, hodi permite katak sidadaun sira hosi nasaun ida ba hela iha país seluk hetan direitu hanesan no sujeita ba obrigasaun ne’ebé hanesan ho sidadaun hosi país ne’ebé sira hela bá.
Jornalista : Arminda Fonseca
Editór : Zezito Silva
