Top

Governu aprova medida protesaun ba timoroan iha diáspora

Vise Primeira-Ministra atual Ministra Solidariedade Sosiál no Inkluzaun (MSSI), Armanda Berta dos Santos, lidera reuniaun Konsellu Ministru, iha Palásiu Governu, kuarta (19/10). Imajen TATOLI/Francisco Sony

DILI, 19 outubru 2022 (TATOLI)– Governu liuhosi reuniaun Konsellu Ministru, kuarta ne’e, iha Palásiu Governu Dili, halo aprovasaun ba dekretu-lei ne’ebé aprezenta hosi Primeiru Ministru, Taur Matan Ruak, kona-ba medida protesaun ba timoroan ne’ebé hetan difikuldade iha rai li’ur.

Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Francisco Sony

“Medida ida ne’e atu loke dalan ba Governu atu iha dalan legál atu aloka rekursu sira nesesáriu atu fó ba timoroan sira ne’ebé infrenta situasaun susar sira ne’ebé la previstu.  Exemplu hanesan sira ne’ebé vistu ba tráfiku ema nian, sira ne’ebé vitima ba dezastre naturál atu repatria mai. Hirak ne’e presiza enkuadramentu legál sira fó dalan ba Governu atu halo alokasaun rekursu,” esplika Ministru Prezidénsia Konsellu Ministru, Fidelis Manuel Leite Magalhães, hafoin ramata enkontru Konsellu Ministru.

Diploma ne’e prevee medida neen ba protesaun timoroan iha rai-liur no define regra sira ba ninia atribuisaun, hanesan, prestasaun sokorru iha kazu katástrofe naturál ka perturbasaun grave ba orden públika, repatriasaun (lori-fila) timoroan sira iha rai-liur, apoiu emerjénsia ba alojamentu, apoiu ai-han emerjénsia no apoiu ba kazu prizaun ka detensaun.

Governu aprova dekretu-lei ne’e ho lais atu nune’e bele halo atuasaun lais ba timoroan sira ne’ebé terus hela iha ema nia-rain.

“Nune’e, dekretu-lei ne’e aprovadu ona hanaran “medida ba protesaun timoroan sira iha rai-li’ur”, katak.

Atu aprezenta dekretu-lei ne’e, nia akresenta iha prinsípiu ida ne’ebé presiza respeita mak igualdade, nune’e hakerek lei no dekretu-lei ida sei la temi atu apoia de’it timoroan sira iha nasaun ida, maibé ba nasaun hotu ne’ebé timoroan sira hela ba no sei regula tuir regulamentu ne’ebé mak sei hatu’ur tuir klasifikasaun.

“Dekretu-lei ne’e la temi de’it ba timoroan sira iha Portugál, maibé ne’e hanesan baze legál ida ba atuasaun Governu nian iha fatin hotu,” akresenta.

Jornalista: Hortencio Sanchez

Editór       : Florencio Miranda Ximenes   

Publisidade

Leave a Reply

Latest Post

error: Content is protected !!