Japaun fó formasaun seguransa marítima ba komandante UPM
DILI, 19 outubru 2022 (TATOLI)- Governu Japaun liuhosi Japan International Cooperation Agency (JICA), fó formasaun Komandante Unidade Polísia Marítima (UPM), hodi hasa’e koiñesimentu, kapasidade no tékniku atu garante estabilidade seguransa marítima no proteje Timor-Leste husi movimentu ilegál no ameasa sira hosi tasi.
“Bazeia ba konvite hosi JICA maka Komandante Jerál PNTL autoriza ha’u mai atu partisipa kursu kona-ba atualizasaun lei sira ne’ebé orienta ba atividade legál maritima nian (Maritime Law Enforcement), hodi define kna’ar no responsável ba koordenasaun atividade sira iha ámbitu haforsa seguransa maritima internasionál nian, ne’ebé maka hala’o iha Yokohama-Japaun durante semana rua nia laran”, haktuir Komandante Unidade Polisia Maritima (UPM), Superintendente, Eugenio Pereira, via telefone iha loron, kuarta ne’e.
Totál partisipante ba formasaun ne’e hamutuk ema nain-18 hosi nasaun ne’ebé la hanesan no sei hala’o durante semana rua nia laran hahú 29 outubru to’o 8 novembru 2022.
“Durante estadia iha Japaun ami halo mós vizita ba estasaun área juridisaun Quartél Jerál Guarda Kosteira nian iha Tokyo, hodi haree besik liu konabá kuadru sistema autoridade marítima nia misaun kontrolu no atividade sira relasiona ho kompeténsia ne’ebé mak sira ezerse inklui observa mós laboratóriu ba Forensik no sentru operasaun guarda kosteira Japaun nian”, afirma.
Lider másimu UPM ne’e agradese ba parseria JICA ho Komandu Jerál PNTL ne’ebé servisu hamutuk hodi realiza kursu intensivu ba ofisiál Polisia Marítima hosi nasaun 18.
Tanba liuhosi formasaun legál ne’e bele hasa’e kualidade rekursu umanu iha nivél koordenasaun, kontrolu no fiskalizasaun iha serbisu Marítima nian liu-liu komponente operasaun nian.
Jornalista: Hortencio Sanchez
Editór : Florencio Miranda Ximenes
