VIQUEQUE, 19 outubru 2022 (TATOLI)— Ekipa hosi Ministériu Transporte no Komunikasaun (MTK), kuarta ne’e, halo sosializasaun kona-ba kodigu estada ba populasaun no ba ema ho difisiénte sira iha munisípiu Viqueque.
Sosializasaun kona-ba kodigu estada nian ba populasaun no ba ema ho difisiénte ho tema ‘Dezenvolvimentu ba Polítika Implementasaun Jéneru iha Área transporte públiku ho seguru ba mudansa inkluzivu’, ne’e halao iha salaun administrasaun munisípiu Viqueque, kuarta ne’e.
Diretór Jerál Administrasaun Finansa hosi MTK, Alvino Maia Bareto hateten sosializasuan ne’e halao hodi fó sai kona-ba papel transporte públiku nian ba populasaun sira nomós ba maluk difisiénte sira iha munisípiu Viqueque.
“Objetivu hosi sosializasuan ne’e, Ministériu hakarak fó sai kona-ba papel transporte públiku nian ba abitante sira nomós ba maluk difisiénte sira iha munisípiu Viqueque. Sosializasaun ne’e mos atu sira bele kompriende asesu ba transporte públiku sira ho hatene uja sinais zebra cross,” Diretór Alvino dehan ba jornalista sira iha administrasaun munisípiu Viqueque.
Nia dehan, ekipa MTK halo sosializasaun kodigu estrada ba populasaun no ba ema ho difisiénte sira atu bele kumpriende no la’o tuir regras sira ne’ebé maka iha ona. Ezemplu, ema la’o tenki iha passeiu leten ka iha trotoar leten, nune’e mos bainhira atu hakat ba estrada sorin tenki liu hosi sinais zebra cross.
Nia dehan hosi sosializasaun sira-ne’e hodi bele hasa’e koñesementu feto rurál, estudante no maluk difisiénte sira bele hatene regra dalan públiku sira ne’ebé iha munisípiu.
“Ha’u hanoin ba oin ita presiza kria nafatin sosializasaun sira-ne’e, atu eduka nafatin ita-nia maluk sira hodi bele utiliza dalan públiku tuir regras ne’ebé loos”, nia hato’o.
Iha fatin hanesan partisipante Candida Gosmão, sujere ba governu hodi kria kondisaun estrada sira iha munisípiu Viqueque ne’ebé dadaun ne’e ho kondisaun sei aat hodi difikulta transporte públiku.
“Ami sujere ba governu hodi aselera prosesu dezenvolvimentu estrada iha munisípiu no liga ba postu sira ne’ebé dadaun ne’e kontinua aat difikulta ita-nia transporte públiku sira. Tanba ita ko’alia kona-ba estrada, maibé agora de’it dalan sei kontinua difikulta transporte públiku”, nia hato’o.
Nia dehan MTK liu hosi Diresaun Transporte Terestre presiza tau sinais zebra cross ba dalan liga ba eskola no igreja sira atu estudante bele ultrapasa ho di’ak.
Partisipa iha sosializasaun ne’e hosi autoridade munisípiu Viqueque, Polísia Nasionál Timor-Leste (PNTL) munisípiu Viqueque, feto área rurál, ema ho difisiénte no estudante sira iha munisípiu Viqueque.
Jornalista : Vitorino Lopes da Costa
Editóra : Armandina Moniz
