OÉ-CUSSE, 19 outubru 2022 (TATOLI) – Organizasaun Nasaun Unida (ONU) kontinua haforsa programa United Nations Development Programme (UNDP) iha Rejiaun Espesiál Oé-Cusse Ambeno (RAEOA).
Asistente Sekretáriu Jerál ONU) no Diretór UNDP ba Ázia Pasífiku, Kanni Wignaraja, kuarta ne’e hasoru malu ho Prezidente Autoridade RAEOA, Arsénio Paixão Bano, hodi diskute atu kontinua reforsa programa UNDP NIAN, liuliu ba bee-moos no agrikultura ne’ebé durante ne’e halo asisténsia iha terrenu.
diskusaun ne’e realiza iha Gabinete ZEESM, Oé-Cusse, ne’ebé akompaña hosi membru Autoridade RAEOA no programa UNDP destakaka iha Oé-Cusse.
Asistente Sekretáriu Jerál ONU no Diretór Rejionál UNDP ba Ázia Pasífiku, Kanni Wignaraja, orgullu tanba autoridade simu delegasaun ho di’ak, hodi diskute kona-bá planu prioridade atu implementa iha Oé-Cusse.
“Ami mai Oé-Cusse, primeira-vez, mai atu haree programa sira-ne’ebé durante ne’e UNDP hala’o ona iha povu Oé-Cusse, tanba Oé-Cusse rai ketan ida iha Timor-Leste, dook hosi kapitál, entaun ita mai observa programa sira oinsá bele reforsa tán iha asuntu sira kona-bá bee-moos no apoiu inisiativa agrikultór sira-nia atividade ligasaun ho produtu lokál, no informasaun teknolojia ba estudante sira,” Asistente Sekretáriu Jerál ONU, Kanni Wignaraja, ko’alia iha Oé-Cusse.
Nia informa, prezensa iha RAEOA sei halo monitorizasaun ba grupu agrikultór sira, hanesan grupu kafé Lakufoan iha sub-rejiaun Pante Makasar, nomos vizita eskola sira kona-bá utilizasaun IT fasilidade bee-moos ne’ebé hetan ona asisténsia hosi UNDP.
Prezidente Autoridade RAEOA, Arsénio Paixão Bano, informa, Oé-Cusse serbisu hamutuk ho UNDP dezde RAEOA hamriik, sempre fó asisténsia halo analiza situasaun iha Oé-Cusse, asisténsia halo planu estratéjiku rejionál inklui asuntu balu ligada ho aprovizionamentu.
“Agora UNDP ita sei kontinua serbisu hamutuk iha área importante sira hanesan bee-moos apoiu grupu feto no grupu agrikultór sira, tanba durante ne’e hatudu progresu di’ak tebes iha Oé-Cusse, ida kona-bá introdusaun Informasaun Teknolojia (IT) iha eskola sira, agora ne’e multiplika ona ba Díli, maibé hahú hosi Oé-Cusse, tanba iha labortóriu iha eskola sekundáriu sira,” nia katak.
Tuir nia, projetu ne’e hahú iha RAEOA hetan susesu tanba hetan asisténsia hosi UNPD, entaun presiza kontinua programa ne’e iha eskola sira, tanba sei distribui mós mobile IT iha eskola sira, no agora multiplika iha Dili, Dili foin hahú eskola ida, entaun nia benefisiu ne’e di’ak.
“Tanba ne’e, ha’u dehan Oé-Cusse nakloke ba ideia inisiátiva atu fó ezemplu, ita bele sai pilotu depois ita bele multiplika iha inisiátiva sira-ne’e iha distritu seluk,” nia afirma.
Jornalista : Abílio Elo Nini
Editór : Evaristo Soares Martins
