SMAC rekuiñese agrikultór Covalima ense rasik kombustível ba tratór
COVALIMA, 19 outubru 2022 (TATOLI)–Servisu Munisipál Agrikultura Covalima (SMAC), rekuiñese agrikultór sira iha Covalima ense rasik komvustível ba tratór atu fila-rai tanba Estasaun Komvustível Mãe da Graça la distribui kombustível.
“Ita hatene Parlamentu Nasional (PN) foti kestaun ne’e dehan tratorista-sira iha Suai fila-rai, agrikultor sira ense rasik mina liu $60.00 ne’e loos, tanba ita ko’alia bazea ba presu merkadu. Ita rekuiñese ho kondisaun tratór tuan la’ós foun ne’e han mina makaas no presu mina mós mudansa. Signifika katak hosi presu normál to’o ona $1,75 entaun prejudika,” Diretór Servisu Munisipál Agrikultura Covalima (SMAC), Domingos Gusmão, hateten ba jornalista sira, iha nia servisu fatin, Tabakolot, kuarta ne’e.
Maske kada tinan Governu apoiu mina gratuita ba agrikultór sira atu fila-rai ho litru 5000, maibé ba tinan 2022 ne’e hafoin asina kontratu ho Estasaun Komvustível Mãe da Graça iha inísiu fulan-setembru tinan 2022 to’o ohin loron ne’e, estasaun refere la distribui komvustível ba Servisu Agrikultura Munisípiu Covalima.
“Ita ko’alia kona-ba mina gratuita ne’e loos tanba kada tinan ita iha. Maibé, tinan ne’e, maske iha inisiu fulan-setembru ita-asina ona dokumentu balun ne’ebé entrega ona ba Mãe da Graça, agora komvustível seidauk to’o. Ha’u konfirma ona ho dirasaun nasionál sira dehan tenta hela oinsá mak bele haruka komvustível, to’o ohin loron ita hein mos la mai,” nia esplika.
Hafoin parlamentu nasional kestiona kona-ba agrikultór sira ense rasik komvustível ba tratór atu fila-rai, Diretór Agrikultura Covalima mós simu kedas, kontaktu hosi diretór jerál rasik husu kona-ba komvustível gratuita ne’ebé apoiu litru 5000, ida-ne’e atu atende Covalima tomak ne’e la sufisiente.
Ho situasaun ida-ne’e, kada tinan agrikultór sira sempre ense rasik komvustivél, tanba komvustível litru 5000 ne’ebé fó apoiu la sufisiénte atu atende agrikultór sira iha munisípiu Covalima.
“Ita-nia situasaun, ita mina gratuita. Foin lalais diretór jerál husu fali mina gratuita halo saida, tanba ne’e agrikultór sira mak ense rasik mina hodi fila-rai, kada tinan hanesan ne’e. Tanba, ita-nia mina gratuita limitadu litru 5000, namdigas atende Covalima tomak,” nia dehan.
Agrikultór sira iha Covalima kuaze seidauk iha kuiñesimentu tanba sira balun tratór mak hakarak hamoos du’ut iha sira-nia toos, kada epoka lakohi hamoos du’ut entaun ida-ne’e prejudika atu hasa’e produsaun.
Tanba, objetivu hosi fila-rai atu hadi’a testura, biolojia no kímika rai tanba kada epoka fila hela de’it testura, biolojia no kímika la akontese, oinsá mak mikro organizmu hola sira-nia papel hodi halo transformasaun restu ai-horis ne’ebé mak hanesan kuda batar no hare-kain sira.
“Tuir regra, tinan ne’e ita fila, tinan oin mai mak ita fila fó tempu ba mokro organizmu ne’e bele halo nia servisu hanesan ita kuda legunos bele aumen estrume,” nia hateten.
Tuir dadus, iha munisípiu Covalima tratór hamutuk unidade 30 no hosi númeru ne’e tratór unidade 15 avaria ona, nune’e labele uza tanba tratór sira-ne’e hahú halo akizisaun iha tinan 2008 no 2010 uza to’o ohin loron.
Jornalista : Celestina Teles
Editór : Cancio Ximenes
