VIQUEQUE, 19 outubru 2022 (TATOLI)— Diretór Jerál Administrasaun Finansa hosi Ministériu Transporte no Komunikasaun (MTK), Alvino Maia Bareto, hateten, iha tempu badak Ministériu liu hosi Diresaun Nasionál Transporte Terestre (DNTT) sei monta sinais tranzitu iha dalan públiku iha munisípiu Viqueque.
“Kona-ba sinais tranzitu iha munisípiu Viqueque ita agora prepara hotu ona ne’ebé hosi Diresaun Nasionál Transporte Terestre (DNTT). Nune’e tempu badak sei lori mai Viqueqeu hodi monta iha dalan públiku sira”, Alvino Maia Bareto, hateten ba jornalista Agência Tatoli, iha salaun administrasaun munisípiu Viqueque, kurta ne’e.
Alvino hatutan, prosesu instalasaun sinais ne’ebé oras ne’e la’o iha MTK loke tiha ona konkursu ba sinais nian no agora manán na’in ba konkursu mós iha ona hein atu ba halo instalasuan iha munisípi ida-ne’e.
“Sinais tranzitu ba nasionál no munisípiu sira ne’ebé maka presiza monta sinais inklui munisípiu Viqueque nian, atu nune’e utilizador dalan públku bele la’o tuir sinais tranzitu sira ne’ebé iha”, nia hato’o.
Kona-ba orsamentu instalasaun sinais tranzitu nia dehan, governu liu hosi MTK prevee ona orsamentu hamutuk $27 mill hodi instala sinais tranzitu hotu hotu iha nasional no munisipíu.
“Tuir planu instalasuan iha tinan ida-ne’e, ita-nia kompañia sira ne’ebé manán ona konkursu ba sinais no sei apoiu hosi DNTT hodi halo instalasaun sinais iha munisípiu sira,” tenik nia.
Iha fatin hanesan Diretór servisu DNTT munisípiu Viqueque, Elvino da Cruz, hatutan bainhira governu instala ona sinais tranzitu iha munisípiu Viqueque husu komunidade sira atu kuidadu no labele atu estraga.
“Kuandu ita instala ona sinais iha ita-nia munisípi, tenke kuidadu tanba sinais hosi Baucau to’o Viqueque kuaze ema estraga maka barak. Maibé ita la hatene katak sinais ne’e ho kustu ne’ebé bo’ot no mai hosi orsamentu estadu. Tan ne’e, munisípiu Viqueque bainhira ekipa mai monta ona sinais tranzitu tenke kuidada no asegura sinais sira ne’ebé DNTT monta,” nia husu.
Jornalista : Vitorino Lopes da
Editóra : Armandina Moniz
