COVALIMA, 20 outubru 2022 (TATOLI)–Organizasaun Asisténsia Legál ba Feto no Labarik (ALFela) servisu hamutuk ho Ministériu Administrasaun Estatal (MAE), liuhosi Administrasaun Munisípiu fó kapasitasuan ba funsionáriu públiku (FP) hamutuk prevene no responde ba vítima tráfiku umanu iha Covalima.
“ALFela realiza formasaun ne’e tanba ALFela servisu hamutuk ho Ministériu Administrasaun Estatál (MAE) liuhosi Administrasaun Munisipiu hodi fó kapasitasaun ba funsionáriu públiku atu eleva sira-nia kuiñesimentu hodi prevene vítima tráfiku umanu iha Covalima,” Koordenadór Asaun Prevensaun no Advokasia iha ALFela, Antónino Marques, hateten ba jornalista sira, iha salaun AMC, Sukaer Laran, kinta ne’e.
ALFela realiza formasaun ba tráfiku umanu ne’e tanba ohin loron feto no labarik-feto barak mak sai alvu vítima ba tráfiku umanu iha Timor-Leste.
“Ita-hotu hatene, ohin loron, inan feton no labarik feto barak mak sai alvu vítima tráfiku umanu. Nune’e. hosi ita-nia partisipasaun no kolaborasaun oinsá hodi bele prevene tráfiku umanu ne’ebé buras iha ita-nia sosiedade nia leet,” nia informa.
Tanba. Nia dehan, munisípiu Covalima besik liu fronteira no vizinu ho nasaun Indonézia, entaun iha risku boot no iha potensiál kona-ba tráfiku umanu bele hala’o movimentu illegal iha fronteira.
“Ita-nia nasaun iha ona lei ne’ebé prodús hosi ita-nia órgaun legislativu sira hodi hamosu lei númeru 03/2016 ho objetivu atu prevene no kombate tráfiku umanu no fó asisténsia ba vítima tráfiku umanu,” nia hateten.
Ho nune’e, atu halo prevensaun ba tráfiku umanu ne’e, primeiru halo diseminasaun informasaun importante alvu dahuluk ba funsionáiu públiku no servisu parseiru relevante hanesan autoridade, komunidade, estudante no joven sira, tanba dala barak tráfiku umanu akontese liu ba joven no inan-feton no labarik feto sira-ne’ebé monu ba ema nia manobra hodi sai vítima.
Reprezentante Administradór Munisípiu Covalima Francisco de Jesus Alves hateten, ALFELA realiza Workshop ba funsionáriu kona-ba tráfiku umanu ne’e importante, tanba ne’e funsionáriu públiku sira tuir formasaun ho sériu.
“ALFela realiza Workshop ba funsionáriu importante ba ita atu hatene kona-ba tráfiku umanu. Ita-boot sira-ne’ebé ohin partisipa atu akapta didiak saida mak oradór sira hato’o,” nia informa.
Autoridade Covalima mós husu ba funsionáriu sira-ne’ebé mak tuir formasaun kona-ba tráfiku umanu ho sériu nia parte sei hato’o ba kargu sefia sira atu haruka funsináriu atu halo relatóriu konaba Workshop tráfiku umanu.
“Ita-boot sira iha ona kuiñsimentu kona-ba tráfiku umanu no imformasaun seluk ne’ebé mak ita-boot sira hetan durante hakna’ar an iha administrasaun, ita-boot sira mak sai ajente informasaun pozitivu ba komunidade,” nia hateten.
Jornalista : Celestina Teles
Editór : Cancio Ximenes
