Governu ho ADB sei asina akordu empréstimu milliaun $70
DILI, 20 outubru 2022 (TATOLI) — Governu Timor-Leste no Banku Aziátiku Dezenvolvimentu (ADB, sigla ingés), sei asina akordu empréstimu milliaun $70 iha fevereiru 2023 hodi investe ba área setór produtivu liuliu iha agrikultura.
Ministru Koordenadór Asuntu Ekonómiku (MKAE), Joaquim Amaral, hateten ohin Primeiru Ministru Taur Matan Ruak, prezide reuniaun komisaun interministeriál ba datoluk nian kona-ba koordenasaun kadeia valór hodi aprova atu simu empréstimu hosi ADB atu finansia liuliu iha setór produtivu agricultura nian, no aprova proposta hosi komisaun tékniku interministeriál nian kona-ba ezekusaun orsamentu milliaun $50 ne’ebé sai hanesan garantia ba kréditu ba kadeia valór.
“Imprestimu hosi ADB ne’e ho montante hamutuk milliaun $70, ita sei asina akordu iha fevereiru tinan 2023, hosi orsamentu ne’e ho nia Grants hamutuk milliaun $5 ne’ebé sira apoiu ona halo asiténsia téknika ba servisu nian iha tinan rua ikus ne’e”, Joaquim Amaral, hateten iha Palásiu Governu Dili, kinta ne’e.
Governante hateten empréstimu hosi ADB ne’e rasik nia durasaun hahú hosi 2023 to’o dezembru 2029 imprestimu ida ne’e ba área prioridade sira mak setór produtivu liuliu iha agrikultura, no integra tan kadeia valór iha komponente ida atu finansia hosi ADB, hodi kobre iha área nutrisaun, seguransa alimentár ho mitigasaun ba mudansa klimátika rai halai.
“Ida ne’e ita foin dahuluk foti empréstimu hodi investe iha setór agrikultura, hein katak ida ne’e bele sai hanesan modelu ida atu hasa’e produsaun iha rai-laran, no rezolve seguransa ai-han, tanba área sira ne´ebé kona projetu ne’e tuir estudu iha munisípiu sira inseguransa ne’e iha númeru ne’ebé boot ho mós sira iha defisiensia bee tanba ne’e mak projetu imprestimu ne’e tenta foku fó soluasaun ba iha situasaun sira ne’ebé agrikutór sira hasoru”, nia hateten.
Munisípiu sira ne’ebé sai pilotu bá orsamentu empréstimu ne’e hamutuk haat, Dili, Ainaro, Manufahi no Atúro inklui Rejiaun Administrativa Espesiál Oé-Cusse Ambeno (RAEOA).
Kona-ba ezekusaun orsamentu milliaun $50 ne’ebé sai hanesan garantia ba kréditu ba kadeia ho valór orsamentu Estadu nian ne’ebé Parlamentu Nasionál aprova iha 2022 sai hanesan garantia ba kompañia sira ne’ebé foti kréditu atu partisipa iha programa kadeia valór ne’e.
Jornalista : Arminda Fonseca
Editór : Zezito Silva
