𝐕IQUEQUE, 20 outubru 𝟐𝟎𝟐𝟐 (TATOLI)— Primeiru-Ministru (PM), Taur Matan Ruak, hateten saudoza Francisca Guterres kodigu ‘Uma Nain’ ninia isin lolon maka ba mundu seluk, maibé saudoza nia memoria sei la mate.
Primeiru-Ministru Taur Matan Ruak fo ninia omenajen ba Saudoza Francisca Guterres ‘Uma Nain’ iha Suku Liaruka, Postu Administrativu Ossu, Munisípiu Vikeke.
Iha serimónia funebre Xefe Governu, hateten inan Francisca Guterres nia isin lolon mak ba mundu seluk, maibé nia memória sei la mate no sei husik hela ba jerasaun atu konta liu-liu ninia partisipasaun no kontribuisaun ba luta rai ida-ne’e nian iha tempu defisil too ohin loron Timor sai nasaun ida.
“Ba Maun Filomeno Soares ‘Manu Aman’, Maun alin no Oan ki’ak sira tomak ba família maun alin sira ne’ebé halibur malu iha ne’e no sira ne’ebé dook la mai iha ne’e, nomos ba Konsellu Kombateten Munisipiu Viqueque, no ba imi hotu ne’ebé iha ne’e, ita lakon bin ida ne’ebé husik hela ita no uluk ona ba fatin seluk. Ita-nia inan nia isin lolón mak ba maibé nia memória la mate, sei husik hela ba jerasaun liu-liu nia partisipasaun no kontribuisaun ba nia luta hodi hetan independensia,” dehan PM Taur liu hosi karta komunikadu ne’ebé Agência Tatoli, asesu iha pajína Primeiru Ministru, kinta ne’e.
PM Taur hatutan, lori Governu tomak nia naran no Guerrilheiro sira nian hato’o agradese ba dedikasaun tomak ba rai ida ne’e, no husu Maromak fó fatin ba nia hodi horik rohan laek.
“Ha’u lori ha’u nia naran rasik, lori Governu ne’ebé ha’u reprezenta, lori Guerrilheiro sira hotu ne’ebé sei moris nia naran hatoo agradese ba ha’u nian inan ba buat hotu ne’ebé halo ba ita-nia rain, obrigadu barak. Husu ba Maromak fó fatin diak ba nia ho rohan laek,” PM Taur dehan.
Biografia Saudoza Francisca Guterres ‘Uma Nain’
Saudoza Francisca Guterres ‘Uma Nain’ moris iha Liaruka, Postu Administrativu Ossu iha loron 22 fulan fulan-maiu, tinan 1961. Matebian oan husi Oca-Hare (Aman) no Lihu-Labo (Inan) nu’udar oan primeira husi bin-alin na’in lima (5).
Saudoza fila hikas ba aman Maromak nia Kadunan Santo iha loron 15 fulan-outubro 2022, husik hela laen Veteranu ho Filomeno Soares ‘Manu Aman’.
Saudóza Francisca Guterres, forma uma ka’in ho Filomeno Soares (Manu-aman) iha tinan 1981. Hosi familia simples ne’e hetan oan na’in sanolu (10).
Saudoza Francisca Guterres “Uma Nain” partisipa iha luta libertasaun ba luta ukun rasik an, hahú iha loron 7 fulan dezembru 1975 to’o iha loron 10 fulan-Outubru 1978 hanesan membru OPMT. Iha fali tinan 1987 hahú halo ligasaun klandestina ho saudózu asistente ‘Calma. Nune’e mos iha tinan 1991 halo ligasaun ho Vise Komandante em Xefe FALINTIL Taur Matan Ruak, Francisco Guterres Lú-Olo, Daitula, no sira seluk iha “Zona 25 de Maio” Ossu-Viqueque parte rejiaun dois nian.
Nune’e iha tinan 1991 to’o 1999, saudóza subar líder Guerrilheiro sira ne’ebé mensiona iha leten, subar iha saudóza nia uma rasik hanesan abrigu ba líder Guerrilheiro sira. Saudóza mós sai hanesan logistika iha nia uma rasik, no sai hanesan mos informadór grileuru sira nian.
Saudóza hetan moras komplikadu iha tinan 2020 no familia no estadu halo esfórsu hodi hala’o tratamentu iha óspital Nasional Guido Valadares Dili, maibé la rekopera nia saúde, no iha loron 15 fulan-Outúbru tinan 2022 hakotu is iha nia uma suku Liaruca, postu administrativu Ossu.
Serimónia funébre ba saudoza ho kódiku Uma-Na’in halot ona iha semiteriu Kaileti-Ana, suku Liaruca postu administrativu Ossu Munisipiu Viqueque no hetan partisipa hosi PM Taur Matan Ruak hamutuk ho veteranu munisípiu Viqueque no família hosi saudoza.
Jornalista : Vitorino Lopes da Costa
Editóra : Armandina Moniz
