PR Horta-Liurai Reinu Komboja diskute kooperasaun ekonómika no komérsiu
DILI, 20 outubru 2022 (TATOLI)—Prezidente Repúblika, José Ramos Horta, kuarta ne’e, hasoru malu ho Liurai Reinu Kamboja, Narodom Sihamoni, hodi diskute relasaun ekonómika no komersiál entre nasaun rua.
“Reinu Kamboja nu’udár reinu antigu tebes, nia istória luta, terus mós hanesan ita, tanba ne’e sira simpatia makaas tebes-tebes. Ohin ko’alia ho Liurai nu’udár ema artista ida. Ohin, hanesan hakat ida hosi diplomasia ho Kamboja ba tinan 20 nia laran,” refere komunikadu imprensa ne’ebé Agencia Ratoli asesu, kinta ne’e.
Ba Xefe Estadu, Timor-Leste rejista avansu makaas iha relasaun diplomátika, maibé presiza aposta iha àrea komérsiu no ekonómiku.
“Ministériu Ekonomia, Komérsiu no Indústria hatene oinsá Timor-Leste sosa no importa foos hosi Kamboja. Bele karun uitoan maibé kualidade di’ák no garante fornesimentu alternativu tanba dala ruma iha krize boot ruma, Vietname mós la konsege halo exportasaun ba ita, ne’e duni Timor tenke diversifika rai ne’ebé importa foos nu’udár alimentu importante ba povu,” Horta dehan.
Prezidente Repúblika mós konvida Liurai Kamboja, Narodom Sihamoni atu vizita Timor-Leste.
“Buka mós investimentu ho setór privadu nasionál no internasionál bazea iha Kamboja, buka sira nia investimentu iha área agrikultura no turízmu iha Timor-Leste. Primeiru-Ministru, Hun Sen vizita ona Timor-Leste. Ohin, ha’u konvida mós Sua Majestade, Liurai Kamboja atu vizita Timor-Leste no nia simu ho laran konvite ne’e,” Xefe Estadu informa.
Timor-Leste no Kamboja sei asina akordu kona-ba servisu aéru hodi permite voo mensal hosi Phnom Penh mai Díli, hodi fasilita pasajeiru hosi Xina mai Timor-Leste, tanba país ne’e jeográfikamente besik liu Xina.
Enkontru ne’e ko’alia mós kona-ba adezaun ba ASEAN tanba Kamboja apoia adezaun Timor-Leste nia integrasaun ba organizasaun rejionál ne’e iha tinan 2023.
Prezidente Repúblika, Ramos Horta, mós sente kontente ho resepsaun vizita hosi Aeroportu Phnom Penh to’o Otél.
Tuir ajenda, Xefe Estadu sei hasoru malu mós ho senadu Reinu Kamboja, entidade militár, setór privadu no alta entidade seluk.
Notísia Relevante: PR Horta ho delegasaun to’o ona Kamboja
Jornalista : Osóroa Marques
Editór : Cancio Ximenes
