BAUCAU, 20 outubru 2022 (TATOLI) – Organizasaun Naun Governamentál (ONG) Rekuperasaun Psikososiál no Dezenvolvimentu iha Timor-Leste (PRADET, sigla inglés) rejiaun leste Baucau enkoraja benefisiária feto na’in-21 atu muda moris liuhosi apoia fundu kiik programa empoderamentu sósiu-ekonómika.
Benefisiária na’in-21 kompostu hosi munisípiu tolu; Baucau, Viqueque no Lautém ne’ebé antes hetan orsamentu ne’ebé apoia hosi Uniaun Europeia (UE) ho totál orsamentu hamutuk rihun $9-resin.
“PRADET iha kompromisu atu hakarak kontinua atividade ne’e atu reforsa benefisiária sira-nia moris iha futuru,” Koordenadór Programa PRADET Rejiaun Leste Baucau, Joana da Costa, ko’alia iha Baucau, kinta ne’e.
Orsamentu refere hahú ho $250 to’o $300 ba kada benefisiária no sei kontinua reforsa bainhira iha progresu atinjimentu di’ak nune’e kontinua mellora liután.
Objetivu programa refere atu apoia vítima bazea ba jéneru, violénsia doméstika no abuzu seksuál ne’ebé hetan fundu kiik hodi realiza atividade negósiu hanesan kioske, fa’an obralan, atividade ortikultura no hakiak animál.
“Bele muda moris tanba antes ne’e vulnerável, uma laiha maibé ikus mai bele iha uma rasik hafoin hetan apoia fundu kiik ne’e,” Joana da Costa akresenta.
Benefisiária hirak-ne’e hetan formasaun refreshing treaning no akompaña hosi PRADET nu’udar fatin hakmatek tanba antes ne’e hasoru problema hanesan bazea ba jéneru, violénsia doméstika, violasaun seksuál no kazu abandonadu.
Benefisiária Umbelina da Costa hosi munisípiu Baucau, urgullu no kontente bainhira hetan fundu kiik hosi PRADET tanba fa’an obralan iha merkadu hodi muda kondisaun moris.
Jornalista : Natalino Belo
Editór : Evaristo Soares Martins
