DILI, 20 outubru 2022 (TATOLI)—Vise Primeiru-Ministra no Ministra Solidariedade Sosiál no Inkkuzaun (MSSI), Armanda Berta dos Santos, informa subsídu $200 ba uma kain ne’e sei atribui de’it ba família vulneravél sira no esklui eis tutulár.
Notísia Relevante: Governu mantein desizaun atribui subsídiu $200 ba uma-kain hotu
“Mezmu universal, ita deside subsídiu $200 ne’e ba ita-nia maluk ne’ebé vulnerável no ita sei esklui membru Governu inklui eis titulár maibé ita haree ba uma-kain ne’ebé laiha kbiit,” Armanda Berta dos Santos informa ba jornlista sira hafoin halo enkontru ho Sekretária Estadu Igualdade no Inkkuzaun (SEII) ho DFAT Austrália, iha Ochard Room Timor Plaza, kinta ne’e.
Daudaun ne’e, ekipa tékniku prepara ona no hein lansa iha 16 novembru tinan ne’e no ekipa pagamentu sei atribui direita ba benefisiáriu sira.
Antes ne’e, iha loron 12 outubru, Governu liuhosi reuniaun Konsellu Ministru (KM) aprova projetu dekretu-lei, ne’ebé aprezenta hosi Primeiru-Ministru , Taur Matan Ruak, ne’ebé prosede ba alterasaun dahuluk dekretu-lei númeru 37/2022, 25 maiu, kona-ba subsídiu fim do ano ba uma-kain, hodi klarifika ámbitu aplikasaun.
Nune’e, Governu mantein desizaun atribuisaun subsídiu $200 ba uma-kain hotu iha territóriu Timor-Leste, maibé ninia natureza mak universál ba implementasaun iha esesaun ba membru órgaun soberania sira no eis titulár sira
Ministériu Administrasaun Estatal (MAE) submete ona dadus uma-kain 39.000 ba Ministériu Solidaridade Sosiál no Inkluzaun (MSSI) ho totál pagamentu millaun $7,8-resin.
Jornalista : Osoria Marques
Editór : Cancio Ximenes
