BTL, E.P disemina lei haat ba konsumidór bee iha Covalima
COVALIMA, 21 outubru 2022 (TATOLI)–Bee Timor-Leste Empreza Públika (BTL, E.P) disemina lei haat ba konsumidór bee iha área urbana munisípiu Covalima.
Lei haat ne’e mak hanesan dekretu-lei númeru 41/202, 25 setembru, kona-ba kriasaun Bee Timor Leste Empreza Públika, dekretu-lei númeru 4/2004, 11 fevereiru, kona-ba aprova rejime fornesimentu bee ba konsumu públiku, Diploma Ministeriál númeru 1/2024, 11 fevreiru, kona-ba tabele tarifáriu no diploma ministerial númeru 1/2009, 5 outubru, kona-ba fiskalizasaun sistema abastesimentu bee.
“Ita-hala’o diseminasaun lei ba konsimidór bee iha área urbana iha munisípiu Covalima ne’ebé durante ita-boot sira hatene kada munisípiu transforma ba empreza públika, nune’e habelar informasaun ba ita-nia konsumidór bele hatene uluk lalaok lei sira-ne’e,” Diretór Operasional no Manutesaun BTL, E.P, João de Piedade, hateten ba jornalista sira iha salaun AMC, Sukaer Laran, sesta ne’e.
Disemina lei ba konsumidór bee sira-ne’e importante, hanesan ba instituisaun relevante sira no konsumidór sira-ne’ebé mak durante ne’e asesu ona bee-moos nune’e sira bele intende lei sira-ne’e.
Ho nune’e, disemina lei la’ós para de’it iha área urbana maibé iha futuru mai koordenadór reprezenta delegasaun kompeténsia destakadu mai iha Covalima sei habelar ba postu administrativu sira.
BTL, E.P presiza disemina lei tanba bainhira konsumidór sira bainhira lahatene lei, hanesan komunidade halo ligasaun bee ba fatin ne’ebé no ho razaun hirak ne’e hanesan dever BTL, E.P disemina lei, nune’e bele intende lei. Bainhira konsumidór iha problema kona-ba bee liga ba BTL, E.P la’ós ba instituisaun sira seluk.
Durante ne’e, BTL, E.P disemina ona lei atu ramata kuaze la’o ona 90% ona maibé falta munisípiu rua (2) mak seidauk finaliza mak hanesan Lautém no Manatuto.
Hafoin disemina lei BTL, E.P sei halo asaun sira, hanesan hakotu ligasaun ilegál, halo melloramentu sistema nune’e ema hotu bele asesu bee-moos no hakotu ligasaun bee ho sanyo.
Reprezentante Administradór Munisípiu Covalima,Vitór Gomes orgullu estabelese Bee Timor-Leste, Empreza Públika (BTL.EP) hodi haree kona-ba área bee-moos, tanba komunidade iha Covalima defisil asesu bee-moos hahú hosi tempu okupasaun Indonézia nian.
“Ita-boot sira akompañia komunidade defisil asesu bee-moos iha tempu okupasaun Indonézia. Ho estabelesimen BTL, E.P, ita-nia komunidade bele asesu bee-moos ho di’ak, tanba bee importante ba ema-nia moris,” nia dehan.
Tuir dadus ne’ebé jornalista Agência Tatoli asesu iha BTL, E.P Covalima, komunidade ne’ebé hela iha área urbana hamutuk uma-kain 1,665 ne’ebé asesu ona bee-moos.
Jornalista : Celestina Teles
Editór : Cancio Ximenes
