DILI, 21 outubru 2022 (TATOLI)–Ministru Administrsaun Estatál (MAE), Miguel Pereira de Carvalho, hateten Governu rekuiñeese feto seidauk partisipa másima iha dezenvolvimentu suku iha munisípiu sira hotu iha Timor-Leste.
“Ita mós rekuñese katak seidauk másimu. Tanba ne’e Governu kontinua fó oportunidade no promove feto sira-nia partisipasaun liuhusi programa oi-oin hodi bele kapasita no involve barak liután iha prosesu dezenvolvimentu iha ita-nia rain,” MAE dehan ba Agência Tatoli, liuhosi WhasApp, sesta ne’e.
Maibé governante ne’e dehan partisipasaun feto iha dezenvolvimentu suku kontinua aumenta ka sa’e ba beibeik kompara ho tinan sira ba kotuk, tanba iha programa Nasionál Dezenvolvimentu Suku (PNDS), partisipasaun feto atinje persentajen ida-ne’ebé boot (refere ba relatório PNDS nian).
“Iha PMOPA ita rejista persentajen partisipasaun feto aas (refere ba relatoriu PMOPA 2022). Iha área polítika nian ita rejista númeru feto sei kiik maibé kontinua aumenta ba beibeik,” nia dehan.
Kontribuisaun ne’ebé líder lokál feto sira halo ona ba sira-nia komunidade mak feto sira mós hatudu sira-nia lideransa hodi organiza komunidade no rezolve problema sosiál sira ho matenek.
Líder lokál feto sira lidera sira-nia komunidade no halo aproximasaun ho domin, tanba feto sira hatene no sente mós komunidade (liu-liu feto sira) nia problema no sira sentimentu.
“Entaun Estadu no Governu tenke kontinua fó oportunidade no promove feto sira hodi hola parte barak liután iha dezenvolvimentu lokál. Tanba to’o agora feto sira kontribui barak ona maibé presiza promove nafatin feto sira-nia partisipasaun,” nia dehan.
Nune’e, Governu sei kontinua kria kondisaun hodi bele involve feto ne’ebé barak liután iha prosesu dezenvolvimentu rai ne’e nian.
Tuir dadus ne’ebé mak MAE iha hatudu katak feto ne’ebé mak partisipa iha líder komunitária ka xefe suku hamutuk 19, xefe aldeia na’in-102, delegada 2233 no joven feto hamutuk na’in-452.
Jornalista : Osória Marques
Editór : Cancio Ximenes
