DILI, 21 outubru 2022 (TATOLI)–Ministru Administrsaun Estatál (MAE), Miguel Pereira de Carvalho, hateten iha trimestre datoluk, MAE ezekuta Orsamentu Jerál Estadu (OJE), 2022 ne’ebé atinje ona 85%.
“Iha tinan 2022, MAE hetan benefísiu hosi Fundu Konsolidadu Timor-Leste ho montante $129,99,958.05 no to’o loron 28 fulan-setembru ezekuta ona 85%, ne’ebé mak $110,198,59.85, la inklui kompromisu ne’ebé assume,” Governante ne’e hateten ba Agência Tatoli, liuhosi WhatsApp, sesta ne’e.
Programa tolu (3) hetan atribuisaun hosi MAE, desentralizasaun administrativa ho montante alokadu hosi $118,761,199, ne’ebé atinje ona ezekusaun orsamentál ba 86% ne’ebé ekivalente ho osan $102,462,782, 57, 510; boa-governasaun no jestaun institusionál ho montante alokadu $11,212,243.05 ne’ebé atinje taxa ezekusaun 69% ($7,724,442.25) no igualdade jéneru no inkluzaun sosiál ho valór ne’ebé aloka $26,516 no ezekuta ona besik 43% ne’ebé ekivalente ho osan hamutuk $11,375.
Iha programa desentralizasaun administrativa ba Programa Nasionál dezenvolvimentu suku (PNDS), ne’ebé iha alokasaun orsamentu ne’ebé boot liu, hamutuk $116,960,065 ne’ebé besik 90% no hosi totál alokasaun ne’ebé aloka ba MAE mós kontribui ba ezekusaun Ministériu Administrasaun Estatál, to’o 28 setembru, Sekretariadu Tékniku PNDS atinje ona ezekusaun 87% ho osan hamutuk $101,597,114.28.
Jornalista : Osória Marques
Editór : Cancio Ximenes
