DILI, 21 outubru 2022 (TATOLI)—Sekretáriu Estadu, Arte no Kultura (SEAK), Teofilo Caldas, relata iha trimestre datoluk (jullu-setembru) tinan ne’e SEAK ezekuta ona verba Orsamentu Jerál Estadu (OJE) 2022 atinje ona 82%.
Notísia Relevante: Trimestre dahuluk: SEAK ezekuta OJE 2022 atinje ona 25,2%
“Agora to’o iha kinta (13/10) ne’e ami atinje ona 82%. Ida-ne’e, ami tama iha kategória ida bom, ne’ebé ami-nia ezekusaun di’ak,” Teofilo Caldas hateten ba Agénsia Tatoli, iha nia kna’ar fatin, Avenida Portugál (anterior Praia Coqueiros), Dili, sesta ne’e.
Iha atividade anuál 2022 ne’e, SEAK implementa tuir kronograma ne’ebé SEAK prepara hanesan kronograma trimestre dahuluk, daruak, datoluk no agora tama ona ba trimestre dahaat ne’e SEAK laiha difikuldade.
Maske nune’e, ho ezekusaun trimestre datoluk ne’e SEAK uza ba atividade tuir kronograma ne’ebé iha, hanesan politika apoiu grupu kulturál.
“Ida mak prezervasaun patrimóniu kulturál, ida-ne’e ita fó apoiu ba uma lulik sira, ida seluk mak sensibilizasaun, ne’ebé ita sensibiliza importánsia patrimóniu kulturál ba estudante sira no ida seluk mós mak fó formasaun dansa no teatru ba estudante sira. Ne’ebé, buat sira-ne’e ami tau hotu iha ami-nia kronograma, entaun implementasaun to’o ona iha kuatru trimestrál ami sente atividade ladun barak ona,” nia informa.
Jornalista : Nelia Fernandes
Editór : Cancio Ximenes
