BAUCAU, 21 outubru 2022 (TATOLI) – Servisu Rejistu no Verifikasaun Emprezárial (SERVE), Institutu Públiku, sukursal munisípiu Baucau durante fulan-rua rejista emprezáriu hamutuk 101 iha postu admistrativu Laga no Quelicai.
Koordenadór SERVE Sukursál Baucau, Bendito Torrezão Amaral de Araújo, esplika, iha fulan-agostu hahú program rejistu movel hamutuk ho Asosiasaun Emprezáriu Mulheres Timorense (AEMTL) ne’ebé programa refere ba dahuluk implementa iha postu admistrativu tolu hanesan Quelicai, Laga no Vemasse.
“Programa ne’e atu fasilita komunidade sira-ne’ebé halo atividade negósiu, liuliu iha áres rurál tanba kestaun distánsia nune’e SERVE bele to’o iha baze,” Koordenadór SERVE Sukursál Baucau informa ba Agência TATOLI iha Vila Nova, sesta ne’e.
SERVE Sukursál Baucau finaliza ona rejistu movel iha fulan-agostu iha postu Quelicai ne’ebé rejistu empreza hamutuk 42 maioria tipu negósiu ho naran individual (ENIN) iha suku hamutuk 15.
Nune’e iha fulan-setembru kontinua iha postu Laga no rejista empreza hamutuk 59 hosi tótal suku 10 ne’ebé maioria ketegòria ENIN no ida mak tipu unipesoal, lda.
Enkuantu postu Vemasse seidauk iha dadus loloos tanba iha faze rekolla dokumentu no tuir planu sei finaliza iha fulan-outubru.
“Husu ba komunidade ne’ebé seidauk bele rejistu nune’e estadu bele halo polítikaa di’ak ba negosiante sira,” Bendito de Araújojo akresenta.
Programa rejistu movel implementa iha postu admistrativu tolu refere fahe ba faze tolu hanesan sensibilizasaun kona-ba lala’ok serbisu SERVE, rekolla dokumentu hodi rejistu inklui ikus mak distribui lisensa negósiu.
SERVE Baucau rasik sei kontinua hikas rejistu movel iha tinan-2023 nune’e bele kompleta empreza sira seluk iha postu admistrativu rua hanesan Venilale no Baguia ne’ebé seidauk rejistu atividade negósiu.
Jornalista : Natalino Belo
Editór : Evaristo Soares Martins
