DILI, 21 outubru 2022 (TATOLI)–Universidade Katólika Timorense (UCT, sigla portugés) João Paulo II nu’udar instituisaun akadémika ida ne’ebé joven, asina ona akordu ba kooperasaun ho Universidade Nasionál Timor Lorosa’e (UNTL) atu hetan apoiu ba dezenvolvimentu área medisina jerál iha UCT.
Reitór Universidade UCT, Padre Joel Casimiro Pinto, garante katak UNTL prontu ona atu apoiu sira hodi dezenvolve UCT iha futuru. Tanba asinatura kooperasaun ne’e atu apoiu prosesu dezenvolvimentu UCT nian iha aspetu espesifiku sira.
“Ha’u hanoin iha área primeiru ne’ebé ita presiza atu hahú maka medisina jerál, tanba UNTL ninia medisina jerál kuaze eziste hotu ona, ita presiza tan doutor no mestra sira atu bele ajuda ami iha área medisina jerál ne’e”, Padre Joel Casimiro hateten ba jornalista sira hafoin asina akordu ho UNTL iha salaun UCT Balide, sesta ne’e.
Reitór Joel hatutan, UCT mós reforsa kooperasaun ho UNTL iha formasaun ba profesór sira iha edukasaun no literatura no arte, nune’e bele kontinua dezenvolve liután UCT iha futuru.
Kooperasaun ne’e desizaun ida ne’ebé loos no di’ak tebes, tanba UNTL nu’udar instituisaun akadémika ida ne’ebé antigu no iha esperiénsia. “Hanesan ema ne’ebé foin mosu mai, labarik ki’ik ida ne’e tenke aprende buat barak liután, liu-liu buka atu aprende ho UNTL ne’ebé konsidera nu’udar irmaun ida ne’ebé mais velho”, katak Joel.
Nia haktuir aprezentasaun hosi Reitór UNTL katak, UNTL iha dosente barak maka doutoramentu. Tanba ne’e UCT buka atu aprende no kolabora hodi aproveita área peskiza no dedikasaun ba moris iha sosiedade.
Reitór UNTL, João Soares Martins, afirma kooperasaun ne’ebé parte rua halo sei haree liu ba área sira ne’ebé maka ninia natureza hanesan. Ezemplu UCT iha kursu medisina jerál, UNTL mós iha, ne’ebé kooperasaun ne’e sei halo bazeia ba área sira ne’ebé hanesan.
Nia dehan apresia kooperasaun ne’ebé halo ona, tanba UNTL nu’udar universidade antiga no UCT konsidera sei joven, maibé parte ida maka universidade rua ne’e bele aprende ba malu. UNTL iha esperiénsia maibé misaun maka ba peskiza no servisu estensaun komunitária, UNTL sei koopera UCT atu organiza semináriu no konferénsia hamutuk.
Agora daudaun UCT ho UNTL rasik mós hola parte iha programa Prezidente Repúblika-nian konaba fraternidade umana ne’ebé kooperasaun hahú ona, hein atu haluan tan ba área sira seluk.
UNTL ninian fakuldade medisina no siénsia ba saúde ho departamentu sira mak; lisensiatura iha enfermajen, baxarelatu iha farmásia, lisensiatura iha medisina jerál, baxarelatu iha nutrisaun no dietétika, no lisensiatura iha parteira.
Notísia relevante: PM Taur espera UCT sai ensinu superiór exelente iha Timor-Leste
Jornalista : Tomé Amado
Editora : Rita Almeida
