VIQUEQUE, 22 outubru 2022 (TATOLI)—Xefe suku Uma Uain Leten, Martinho Soares Gusmão informa, sábadu ne’e, tuku 10h00 dadeer, akontese ahi han feto faluk Celestina Saldanha nia uma iha Tutukui, suku Uma Uain Leten, postu adiministrativu Viqueque Villa, munisípiu Viqueque.
Autoridade lokál ne’e haktuir, akontesimentu ahi han uma ne’e vítima ninia sasán sira iha uma laran balu hetan salva hosi komunidade no balun lakonsege salva.
“Ahi han uma feto faluk ida-nia uma iha ha’u-nia suku, ami hamutuk ho komunidade ba halo prevensaun no lori sai vitima nia sasán iha uma laran, maibé sasán uma laran balun ami la konsege salva,” Martinho Soares Gusmão hateten ba Agência Tatoli, liuhosi telefónika.
Nia haktuir, ahi han hosi uma kakuluk mak afeta ba uma tomak to’o ahi an mohu uma ne’e, maibé komunidade konsege lori sai feto faluk hosi uma laran, se la’e feto faluk ne’e ahi han iha ninia uma laran.
Tuir nia, feto faluk ne’e ninia uma la uza enerjia eletrisidade kuaze tinan barak, loloos ne’e ema atu dada eletrisidade ba inan faluk ne’e nia uma maibé feto faluk rasik mak lakohi, nune’e durante ne’e nia uza de’it lampu tradisionál.
Vítima feto faluk ninia uma ne’e uma duut ida no feto faluk ne’e hela mesa-mesak iha uma ida-ne’e nia laran tanba ninia oan sira daudaun ne’e buka hela servisu no hela hotu iha Dili,
“Hosi akontesementu ne’e ha’u informa ona ba parte relevante hodi fó apoia emerjénsia ba ita-nia vítima feto faluk ne’e. Maibé to’o agora dirasaun apoia emerjénsia seidauk to’o iha fatin akontesementu. Ha’u hanoin parte relevante sira presiza fó apoia emerjénsia ruma ba vítima hodi auguenta moris tanba ninia sasán sira ahi han hotu ona,” nia dehan.
Tuir nia, vítima insendiu Celestina Saldanha nu’udar mós desterada polítika ida-ne’ebé iha tempu okupasaun Indobnézia destera ba Ataúro, no bainhira nia laen mate mak feto faluk ne’e hela mesak iha uma refere.
Jornalista : Vitorino Lopes da Costa
Editór : Cancio Ximenes
