iklan

NASIONÁL, INTERNASIONÁL, POLÍTIKA

Empreza Aérea Kamboja sei estuda voo mai Timor-Leste

Empreza Aérea Kamboja sei estuda voo mai Timor-Leste

Prezidente Repúblika, José Ramos Horta, sai sasin ba assinatura akordu entre Ministra Negosiu Estranjeiru no Kooperasaun Adalgiza Magno ho Reiñu Kamboja. Imajen/Mídia PR.

DILI, 22 outubru 2022 (TATOLI)—Prezidente Repúblika, José Ramos Horta, defende nesesidade atu iha konetividade aérea entre Timor-Leste no Kamboja hodi fasilita mobilidade sidadaun.

Xefe Estadu ne’e sai sasin ba assinatura akordu entre Ministra Negosiu Estranjeiru no Kooperasaun Adalgiza Magno ho Reinu Kamboja.

Prezidente Repúblika, José Ramos Horta, sai sasin ba assinatura akordu entre Ministra Negosiu Estranjeiru no Kooperasaun Adalgiza Magno ho Reiñu Kamboja. Imajen/Mídia PR.

“Akordu ne’e, bolu air service agreement (akoordu servisu aéru) ne’e hanesan akordu umbrella (sombriña). Signifika akordu jerál, nune’e bele dezenvolve konetividade aérea, atu ita bele iha voo normál entre Kamboja no mai Timor no Timor ba Kamboja. Sira sei estuda,” Prezidente Repúblika, José Ramos Horta, hateten liuhosi komunikadu imprensa ne’ebé Agência TATOLI asesu, sábadu ne’e.

Tuir Xefe Estadu, akordu servisu aéru ne’e la signifika halo lalais konetividade, tanba presiza halo investimentu hosi empreza Kamboja balun.

“Sira bele halo, sira sei estuda, bele ka lae, iha sustentabilidade ka lae, iha passajeiru ka lae, maibé kompañia aérea iha mundu. Sira-nia Governu subsidia makaas tanba negósiu aéru, kompañia aerea, la’ós fásil.” Horta dehan.

Estadu Timor-Leste no Reiñu Kamboja presiza tau investimentu, hodi dada interrese husi empreza aerea ruma, atu halo operasaun mensál tanba empreza boot hanesan Fly Emirates no Qatar Airway mós hetan apoiu makaas husi sira-nia Governu.

Projetu ne’e sei sai alternativu ba viajen entre Dili ba Phonom Pen no mos ba kontinente Europa no ba Xina ho folin billete baratu.

“Se buat sira-ne’e estuda halo didi’ak, halo promosaun di’ak, passajeiru sira hosi Xina, sira mai Phonon Penn, tanba aviaun hosi Xina mai Kamboja ne’e, atus ida kada loron. Aviaun oioin, balun karga aérea, balun turista. Entaun passajeiru hosi Xina hakarak  ba Timor, uluk liuhosi Singapura, liuhosi Bali sempre problema, bele karik mai Phonon Penn ba Timor-Leste,” nia hateten.

Prezidente Republika hateten, nia halo konsulta ho entidade barak no presiza investimentu makaas hodi fó estímulu ba iha setór seluk.

Jornalista : Osoria Marques

Editór       : Cancio Ximenes

iklan
iklan

Leave a Reply

iklan
error: Content is protected !!