iklan

NASIONÁL, INTERNASIONÁL, POLÍTIKA

Kamboja apoia Timor-Leste adere ba ASEAN

Kamboja apoia Timor-Leste adere ba ASEAN

Prezidente Republika, José Ramos Horta, hala’o enkontru Primeiru-Ministru Kamboja, Hun Sen, hodi ko’alia kona-ba reforsa relasaun bilaterál entre Timor-Leste ho Kamboja. Imajen/Mídia PR.

 

DILI, 22 outubru 2022 (TATOLI)—Prezidente Republika, José Ramos Horta, hala’o enkontru kortejia ho Prezidente Senadu, Say Chhun, Prezidente Asembleia Nasional, Heng Samrin no Primeiru-Ministru, Hun Sen, hodi ko’alia kona-ba reforsa relasaun bilaterál entre Timor-Leste ho Kamboja.

Enkontru ho alta entidade hosi Reiñu Kamboja, reprezenta Kamboja nia prontidaun hodi apoiu Timor-Leste nia adezaun ba ASEAN.

“Primeiru-Ministru, Hun Sen, admira tebe-tebes ba Timor-Leste. Nia apoia makaas tanba sira-nia istoria ne’e hanesan ita-nian, tanba ne’e nia apoia makaas Timor-Leste nia adezaun ba ASEAN. Laiha asuntu ne’ebe ko’alia ho Prezidente Assembleia Nasional, Senadu, asuntu ne’ebe ko’alia ho Primeiru-Ministru, ko’alia ho entidade ministeriál sira seluk,” Xefe Estadu ne’e hateten liuhosi komunikadu imprensa ne’ebé Agência Tatoli asesu, sábadu ne’e.

Tuir Horta, prosesu adezaun ba ASEAN seidauk kompletu tanba líder hosi nasaun sira iha ASEAN, seidauk anúnsia kalendáriu maske Timor-Leste hakarak adere ba organizasaun ne’e iha tinan oin.

Prezidente Republika, José Ramos Horta, hala’o enkontru kortejia ho Prezidente Senadu, Say Chhun, Prezidente Asembleia Nasional, Heng Samrin no Primeiru-Ministru, Hun Sen. Imajen/Mídia PR.

“Maibe sei tuir “road map” ne’ebé lideransa ASEAN hetan konsensu. Karik mak deside no sei anúnsia karik, ita prepara tiha ona tinan 10 mai ne’e. Seidauk prepara kompletu, konforme planu Governu nian atu rekruta Timoroan 2.000, maibé Timoroan ne’ebé ho estudu ho kualifikasaun lingua ingleza, formasaun universitária di’ak nune’e servisu iha setór hotu-hotu atu bele aprova duni, dinamiza ita-nia partisipasaun iha ASEAN,” Horta dehan.

Ba Prezidente Repúblika, partisipasaun Timor-Leste nian iha ASEAN importante tebes, tanba hola parte iha desizaun, opsaun estratéjiku, hodi dinamiza atividade ekonómika, komérsiu rejionál no seluk tan.

Hafoin remata enkontru ho Primeiru-Ministru, Hun Sen, Prezidente Republika, Jose Ramos Horta mós sai sasin ba asinatura akordu entre Governu Timor-Leste ho Kamboja ne’ebe asina hosi Ministra Negosiu Estranjeiru no Kooperasaun, Adaljiza Magno, kona-ba servisu aéru, hodi dezenvolve konetividade aéru entre Timor-Leste no Kamboja.

Ministra Negosiu Estranjeiru no Kooperasaun, Adaljiza Magno mós asina akordu ho Kamboja kona-ba exportasaun foos ba Timor-Leste.

Jornalista : Osoría Marques 

Editór       : Cancio Ximenes

iklan
iklan

Leave a Reply

iklan
error: Content is protected !!