MSSI distribui sertifikadu ba formandu na’in-108 Viqueque
VIQUEQUE, 22 outubru 2022 (TATOLI)—Ministériu Solidaridade Sosiál no Inkluzaun (MSSI) distribui sertifikadu ba formandu sira hosi grupu traballu hamutuk na’in-108 ne’ebé tuir ‘Formasaun Profiisonál Servisu-Na’in Sosiál iha Timor-Leste’ iha munisípiu Viqueque.
Xefe Gabineti Dirasaun Estudu Planeamentu Dezenvolvimentu Instituisionál iha Ministériu Solidaridade Sosiál no Inkluzaun (MSSI), Gil da Cruz, hateten objetivu hosi formasaun ida-ne’e hodi adi’a sistema kona-ba atendimentu labarik no família sira hosi formasuan ne’e hodi hasa’e grupu traballu sira hodi halo atendimentu di’ak.
“Durante ita ukun an ne’e, ita haree ita-nia sistema atendimentu ne’e bainhira mosu akontesimentu ruma mak hafoin ita hala’o hamutuk hodi halo intervensaun. Entaun agora ita muda sistema atendimentu bazea ben estar ba labarik, família no grupu vuneravél sira hodi fó atendimentu ida-ne’ebé di’akliu,” Gil da Cruz hateten ba jornalista sira, iha sentru evakuasaun Viqueque, sábadu ne’e.
Sistema ne’ebé MSSI opta la’ós ba halo intervensaun de’it maibé tenke halo servisu liuhosi promove ba ben star ba labarik, família no vuneravél sira no oinsá prevene situasaun risku sira labele akontese.
“Ita umana labele espera akontesimentu ruma. Bainhira akontese ita buka solusaun oinsá mak ita bele halo atendimentu tanba halo atendimentu parte MSSI mesak labele. Tan ne’e, kria formasaun ba entidade sira tantu hosi Governu, sosidade sivil no autoridade lokál sira hodi halo atendimentu di’ak ba ita-nia komunidade,” nia dehan.
Grupu ka ekipa ne’e mak hanaran Profisionál Servisu Na’in iha Timor-Leste ne’ebé kompostu hosi Polísia Nasionál Timor Leste, autoridade lokál, saúde no edukasaun sira iha munisípiu Viqueque.
“Formasaun ba grupu sira-ne’e la’ós to’o iha ne’e de’it maibé ba oin MSSI sei kontinua fórmasaun ba ita-nia grupu sira hodi hasa’e sira-nia kuiñesimentu liga ba atendimentu iha baze,” nia dehan.
Sekretáriu munisípiu Viqueque, José da Costa de Sousa, haktuir liuhosi formasaun sira-ne’ebé ekipa traballu sira hetan, ba oin sira bele halo atendimentu ho di’ak ba labarik no família vulneravél sira iha munisípiu Viqueque.
“Grupu traballu sira-ne’e mesak ema esperiénsia. Nune’e, espara ba oin ita-nia formandu sira-ne’e bele halo atendimentu di’ak ba ita-nia labarik sira no família sira iha Viqueque,” nia dehan.
Grupu traballu formandu sira hosi postu adiministrativu haat ne’ebé kompostu hosi postu administrative Uatulari, Viqueque, Ossu no Lacluta ne’e hamutuk na’in-108 ne’ebé tuir formasaun MSSI nian durante semana ida-nia laran ne’ebé realiza iha Viqueque.
Iha serimónia distribuisaun sertifikadu ba formandu sira-ne’e, partisipa hosi komadante Polísia Nasionál Timor Leste (PNTL) munisípiu Viqueque, reprezentante diretór protesaun labarik hosi UNICEF, adiministradór postu administrative no formandu sira.
Jornalista : Vitorino Lopes da Costa
Editór : Cancio Ximenes
