Saudozu Lorico Maubere haloot iha semitériu Apataba-Isi Viqueque

VIQUEQUE, 23 outubru 2022 (TATOLI)—Reprezentante família saudozu António Soares “Lorico Maubere”, Alexandrarino Martins, hateten  família deside  saudozu António Soares “Lorico Maubere” ne’ebé hetan moras kumplikadu no hakotu iis ne’e, haloot ona iha semiteriu Apataba-Isi, suku Maluru, postu Viqueque villa, munisípiu Viqueque.

Alexandrino Martins haktuir, saudozu hetan moras komplikadu hahú moras tinan 2020, nune’e ba halo tratamentu saúde iha hospital referral Eduardo Ximenes Baucau no Hospital Nasionál Guidp Valadares (HNGV) Dili maibé la konsege rekopera.

“Foin lalais, kuarta (19/10), saudozu hetan moras fila-fali família sira lori ba hospital Internamentu Viqueque, doutór sira halo atendementu maibé la konsege salva no iha tuku 10h00 kalan saudozu hakotu  iis. Nune’e família lori mate-isin fali mai ninia rezidénsia. Ami família tomak sente triste lakon ami-nia alin di’ak ida iha ami-nia leet,” Alexandrino Martins hateten ba jornalista sira, iha semitériu Apataba-Isi, suku Maluro-Beaço, sesta (22/10).

Diretór Eskola Sekundáriu Jerál (ESJ) Viqueque, José Clmenyino, hateten saudozu nu’udar profesór di’ak ida iha eskola ESJ 01 Baucau ne’ebé durante ne’e fó ninia dedikasaun tomak hodi hanorin no agora niia estudante sira sente professor di’ak ida.

“Ami sente triste tebes ne’ebé lakon ami-nia kolega di’ak ida, durante ami serbisu hamutuk hodi eduka estudante sira ESJ 01 Baucau. Ami la haluha hato’o ami-nia sentidu kondolénsia profunda ba família sira hotu,” nia dehan.

Biografia

Matebian António Soares moris iha loron 13 fulan Agustu  1976 iha knua Macalico, suku Uma-Uain Leten, Oan hosi inan-aman Abilio Soares Martins no Domingas Soares nu’udar oan daneen (6) hosi maun-alin hamutuk 11.

Saudozu  hahú forma uma kain hodi kaben Melintina (mate ona ) ne’ebé sira-nia oan hamutuk nain hitu (7) ne’ebé kompostu hosi Jonizio Gevio de Sá Martins no  Grecela Soares Freitas no nain lima (5) fila hikas ba Maromak nia uma.

Saudozu Antonio Soares hahu nia estudu iha SDN. 05 Beaco 1984-1990. Kontinua estudu iha SMPK hati Kudus Yesus Dili 1991 no ramata iha tinan 1993. Nune’e, saudozu kontinua estudu iha sekundariu  01 Viqueque iha 1994 ramata iha tinan 1996. Alende ne’e, saudozu kontinua estudu iha nivel universitáriu,sekolah tingi kejuruan dan Ilmu

pendidikan “Wijaya Yuwana” Madiun-Jawa Timur no konsege hasai lisensiatura  (hahú hosi 1997 ramata iha tinan 2003). Saudozu kontinua estudu no hasai mestradu iha área espesialidade teknólojia edukasaun iha tinan 2019 rama iha tinan 2020.

Durante ne’e, saudozu nu’udar profesór hahú 2006 sai profesór kontratadu iha ESG 01 Baucau, iha tinan 2009 sai hanesan segundu vise diretór ESG 01 Baucau. Iha tinan 2011 sai profesór permanente iha ESG.01 Baucau. Iha tinan 2014, asume kargu hanesan primeiru vise diretór ESG.01 Baucau. Iha tinan 2016-2022 sai nu’udar konsilleiru estudantil iha ESG.01 Baucau iha tinan 2022 kaer materia lian inglês iha ESG.01 Baucau.

 Partisipa luta iha frente kladestina

Durante luta libertasaun hahú 01 janeiru tinan 1989 to’o 30 agustu tinan 1990, nia assume kargu nu’udar sekretáriu grupu Railakan Rama Hana. Iha 01 janeiru tinan 1990 to’o 02 janeiru 1992 saudozu asume kargu nu’udar vise sekretariu kaixa Rama.  Iha loron 02 janeiru 1992 to’o 04 dezenbru 1995, nu’udar vise Sekretáriu no xefe seksaun Informasaun to’o 02 dezenbru 1996.

Iha 02 dezenbru 1996 to’o 10 dezenbru 1997, nia sume kargu nu’udar seksaun propaganda no informasaun to’o tinan 1998. Saudozu envolve iha grupu estudante RENETIL hala’o manifestasaun no demostrsaun iha Jakarta-Indonézia  ne’ebé dirije hosi Saudozu Fernando La Sama de Araújo ho estrutura sira seluk. Nune’e, iha tempu ne’ebá militár Indonézia kaptura nia hodi sulan iha sela Polísia Kebung Jeruk Jakarta no halo torturasaun ba nia.

Depois ida-ne’e, Cruz Vermella Internasionál ba fatin refere hodi hasai saudozu ho maluk sira seluk ne’ ebé heten kastigu iha sela Policia Kebun Jeruk Jakarta. Maibé militár Indonézia tau matan nafatin ba sira.

Envolvemento saudozu Antonio Soares iha RENETIL hala’o manifestasaun no demonstrasaun iha Jakarta to’o agora ninia dokumentasaun iha demostrasaun sei rai to’o agora. Nune’e mós  saudozu António Soares “Lorico Maubere” envolve hotu iha manifestasaun 12 Novembru tinan 1991 Dili. Depois ida-ne’e saudozu Antonio Soares “Lorico Maubere” hamutuk ho estudante Renetil buka dalan mai fali iha Timor atu organiza malu hodi kontra militár  Indonézia.

Saudoso Antonio Soares hetan ona rekuiñesimentu hosi Governu no simu ona pensaun ka subsídiu ka pensaun subsisténsia 8-14.

Iha serimónia funebre ba saudozu António Soares “Loriku Maubere” hetan partisipa hosi adiministradór munisípiu Viqueque, Januario Soares “Bolly”, konsellu veteranu munisípiu Viqueque no família hosi saudozu.

Jornalista : Vitorino Lopes da Costa

Editór       : Cancio Ximenes